新組好ê NRS2囥佇遐半冬，今仔日頭擺牽出來試騎一下。聽著輦仔ê粒仔佇塗跤磨sua~sua~ê聲，想著較早佮車隊做伙騎車，2、3十台車輦仔ê聲是這馬ê2、3十倍。

本底是欲騎去屏東科大，peh一下仔崎，結果騎無3公里開始滴雨，山彼爿ê天烏khâm-khâm ，來轉！後禮拜才閣騎。

 

Gogoro日誌_換倒手爿擋仔開關

前一站仔，倒手爿擋仔te̍nnh--luè有當時仔著，有當時仔袂著，到尾仔完全袂著，開關歹去--ah。

去電商網站揣，1條愛450-，而且愛拆頭前規鉼ê殼仔，無張持去看著這篇，原來he是gogoro特製--ê，會使干焦換hit个開關，線留--leh koh免拆外殼。刀仔攑--leh就共割予斷，挈歹去hot粒去材料行合，相連紲走4間攏無，無奈何騎去google地圖頂面負評上蓋濟hit間，頭家入去phián一下仔，挈1粒出來，形體無仝毋閣空對會起來，百五箍。

包裝寫台灣製造，毋過實在是泰國做--ê，大牌子國際牌Panasonic應該品質會khah好，閣去買2枝母--ê phín。

本來線是欲用燒--ê，看看--leh攑尖喙鋏仔用挾--ê就好，開關鎖--khí-khì，2枝phín插予好、開電，擋仔lè-bah te̍nnh--luè，後壁燈著--ah，按呢毋免10分鐘。

屏東市老店

 泡綿攄仔ê露絲仔生鉎漚去，泡綿落落來，擲hat捔會加製造污染，想講閣會使用，想欲閣拖長伊ê命看會使儘量較慢變糞埽無。

來去夜市仔口五金行揣，較早夜市仔口規條仁愛路攏違章，規排攏是teh賣五金、機械類。

這間足久無來--ah，hóo﹏足驚人，物件囤kah規間像回收場，完全無法度看著塗跤，毋koh頭家有影厲害，共講了，斡頭入去phián一下仔，挈2種長度--ê出來予我揀。

吉隆五金

過年語言調查

 【語言調查】

ki-hu

肌膚

意義：體力、身體狀況
例句：伊愈來愈無ki-hu
(身體愈來愈䆀、愈無體力)

揣台語：
https://chhoe.taigi.info/TaijitToaSutian/33311
台日大辭典1931：
https://thak.taigi.info/1931TaijitToaSutian1/chheh/?page=287

教育部臺灣台語常用詞辭典：
https://sutian.moe.edu.tw/zh-hant/su/29423/

#過年語言調查
#台語
#TaiGi

東港語言調查

 【語言調查】

地點：大潭(大鵬灣)，東港

日期：2023.04.29

洘流：ebb tide海水退

飽流：flood tide海水漲

飽流在：海水漲到上懸，到開始退--ê這段時間

*(洘流在)

洘流飽：海水退到上低了後ê飽流

飽流洘：海水漲到上懸了後ê洘流

*受訪者無講著"洘流在"

細漢ê ǹg望

【美國塗豆】

這種食物阮講美國塗豆，hit陣ê台灣人掠準米國ê物件逐項大，米國車足大台、米國se-bí-loh足大su。細漢ê時這種物件真罕見，koh過年過節嘛仝款。

做囡仔ê時，若食著足愛食ê物件，攏會怨嘆講，ha̋nn﹏khài這緊就無--ah，閣足想beh食--neh，後páinn大漢一定beh買足濟足濟，食予過癮、食kah叫毋敢。有一páinn予阿媽𤆬去hông請，出菜進前ê四秀仔其中就有美國塗豆，想beh攏總ânn來食，koh歹勢，邊仔有別人，惦惦仔、寬寬仔拈，差不多攏我食去，別个大人應該是想講讓予囡仔食無要緊。

Tsit馬我攏去買生--ê轉來家己“烘＂，其實是用microwave爐，beh烘偌loo家己控制，有當時仔食甜--ê、有當時仔食䶢--ê，真正是會食kah叫毋敢、食予過癮。

台語新詞 【電筆】

【tiān-pit電筆】

用iPad上課ê時，攑電筆teh點，三、兩下了後，e̋~ khái無反應，hit pha電源指示電火hua去--ah，就隨講"無水--ah"，坐頭前排ê查某學生本來細細聲笑，愈笑愈大聲，差一點仔笑反kuè，“ah~是無電--ah”隨反口供，koh家己笑笑仔“ha！講慣勢去--ah”...

【狗仔癀】

 

狗仔瀾有癀

半爿手蹄仔腫kah若麵腸仔

一空一空ê牙痕

是你來過這个世間ê証明

【屏東點心】

新庄仔媽祖廟口豆花（新圍慈天宮）

這擔豆花特別ê所在是怹ê糖毋是糖膏，是碎冰，熱人來食上蓋讚，koh有摻綠豆仔、紅豆仔，食起來袂傷甜，毋閣我khah愛食足甜--ê -ah -ah -ah。

這間新庄仔媽祖廟，足久足久以前，可能一、二十年前，我有夢著，袂記是坐啥mi̍h人ê車，阮已經過身去ê阿公坐我倒手爿，車拄好停廟前，我斡頭過去就看著這間媽祖廟，應該是暗時仔，因為我會記得廟五花十色ê燈仔火，hit時我才知影我ê夢是彩色--ê，聽講會做彩色夢ê人頭殼較巧。

微羅港新娘

古早古早，日本時代ê故事。微羅就是現此時ê彌陀。
有一个tsőo囡仔，足愛食雞頷頸，老母疼囝，定定iap予伊食。伊嫁去微羅港，入門ê隔轉工透早，佇灶跤teh剁雞肉，紲手就共一塊雞頷頸that入喙，就佇仝這个時陣ê仝這个時間，雄雄聽著後壁ê跤步聲來到灶跤門口，是怹大家，tshuah一tiô喘一下大氣，一塊雞頷頸猶未哺就吞吞luè，哽著嚨喉，一下仔就死死昏昏去。
佇日本時代，普通人若過身去是無teh打桶囥過暝 ，閣再這个新娘娶來頭一工就過身去歹吉兆，會帶衰翁婿這爿，當日就扛去埋。
較早定定聽講有彼號偷挖墓--ê，怹攏有法度知影佗位有、啥物款墓有好空通好thio。消息遐爾仔通光，hit暝兩个偷挖墓--ê就來到暗bong-bong無半个人e墓仔埔，紮著機司揣到這个新娘ê墓前，怹想講這新娘拄嫁來，定著佮袂少嫁妝按呢。
新墓塗無蓋tsa̍t，無一下仔久就著棺木，驚仔hông做譴sńg，共偃起來，前三後四lua̍h-lua̍h咧，就佇仝這个時陣ê仝這个時間，哽佇嚨喉ê彼塊雞頷頸煞落落luè，喘一个大氣了後就精神起來，這兩个偷挖墓--ê驚一下險仔滲尿，起跤lōng，哀爸叫母，走kah phùn框。好哉在拄埋luè無幾點鐘，棺木嘛無打桶，嘛哉在有內底彼sut 仔空氣。

猶未完全回復元氣ê這个新娘，用盡上尾ê氣力，足無簡單行轉去到厝--lìn。這个時陣怹翁婿拄peh起去眠床頂欲睏，叫是看著怹某e鬼魂轉來，驚kah規身軀tsiâu起雞母皮，喙--lìn一直踅踅唸：阿彌陀佛--ooh，你欲去就做你去，毋好閣轉來揣我--lah，你若有欠用啥我才閣燒予你--lah...。
這个新娘講：無啦，我無死啦，怹翁講：我毋信，阿無你共手伸入來予我摸看覓--leh，ai-iō閣有影燒燒，才放心開門予怹某入來。
後來，人若講著足sâi食ê查某人，就共khau洗講：阿你這微羅港新娘啦！

【屏東人ê早頓】

屏東涼麵攏是甜--ê，而且是當做早頓teh食。有摻糖粉kah塗豆麩，大部分有瓜仔薟，有ê較工夫--ê閣有豆菜。

mih-sooh湯是sa-bì-suh --ê，會記得第一碗愛食原味--ê，這間有芳芫荽，愛食偌濟家已khat。

麵ê搵料愛留下毋好討債㧒捔，共濫落去第二碗湯內底，就會使食著完全無仝款ê滋味。

ママチャリ東京mamachari--第２工20180801

Tsőo人車踅東京

這擺攏無計畫行程，儘量去毋捌去過ê所在，干焦想上尾兩工閣去横浜，第九工透早就上飛行機矣，等於佇東京睏六暝。

透早起床那看新聞那想今仔欲去佗位，款好共物件鎖佇櫥仔內，干焦揹一跤小跤揹仔出門，嘛免揹囥車籃仔內就好。

來去柴又（shibamata），路線無規劃，干焦知影方向，感覺無蓋確定ê時才閣開地圖來看。向東行會迒過幾若條溪，uê會過兩擺，因為溪仔是彎--。騎過隅田川橋，對浅草出來向東代先拄著隅田川（sumidagawa），岸邊有足濟人teh運動，日本齣嘛定會來遮出外景。Sky Tree真正有夠懸，已經騎足遠--矣嘛攏猶閣有看著。

橋雙爿邊攏有人行道，騎佇頂面會使寬寬仔騎兼看風景。 過荒川就是葛飾，葛飾這方面uê是較舊ê市区，閣有大正、昭和ê氣氛。停毋知幾个青紅燈，過中川佮新中川頂面ê橋，無偌久接著柴又街道，斡倒手爿向北一直騎，先去柴又帝釋天（神社），車仔鎖佇遮，入去参拜閣抽一支籤，神社頭前ê参道嘛是老街，用行--ê去車頭看寅さんê像，毋閣這齣戲我完全無印象。中晝頓去Lawson買一个便當轉去車頭揣椅仔坐teh食。行回頭看著一間專門teh買tshit迌物仔ê店，店內攏是古早味ê物件，食--ê、耍--ê規厝間滿滿是，原來是一間tshit迌物仔博物館（柴又のおもちゃ博物館）。
Uì神社邊踅過，踅過“寅さん記念館”去後壁ê柴又公園休中晝，公園是起佇護岸頂，有電梯通坐落去記念館。
休睏煞順護岸邊ê路落去，順神社邊ê路騎，欲去亀有揣烏龍派出所，雖然我無teh看hit齣 bang-gah。佇高砂八丁目斡正手爿一直騎，過中川橋就是亀有，揣無會使停車ê所在，看著一間銀行外口有堆跤踏車，就揣一个縫插入去。車頭附近有tshāi幾偌仙両さん佮其他人物ê像，真正有進入bang-gah內ê fu，毋過hit間派出所毋是烏龍派出所。

過來想無閣會使去佗位，騎“曳舟川親水公園綠道”回頭，遮可能古早時是一條溪仔ê款。雙爿邊ê厝離足遠，四、五十米有，一爿是車路、一爿是三、四公里長ê親水公園，有水池仔、有噴水池，停車（跤踏車）蓋利便，有便所閣有沖水洗身軀ê所在，足濟家長tshuā囡仔來耍水，囡仔teh耍水家長佇邊仔開講。
軁過高架快速道路下跤，騎佇新四ツ木橋頂過荒川，懸懸ê sky tree就佇頭前。轉去到隅田川浅草附近才四點外，共車鎖--leh，用行--ê落去岸邊散步。
下暗身軀洗好騎出去揣十間橋，是看sky tree夜景上好ê所在，愛共sky tree佮十間川ê倒影做伙翕起來，這嘛是日本齣“正義のセ”ê撮影地，下暗足濟人佇附近散步，sky  tree ê夜景配bi-luh有夠讚。
写真

ママチャリ東京mamachari--第一工20180731

舊年去日本耍了無夠癮，今年閣來去，毋過機票一直拖到三月才訂，高雄起飛攏足貴， 揣桃園起飛个，俗高雄差不多3千，kah舊年比起來嘛是有較貴一sut仔。
阿機票欲按怎訂？佗一工？攏總幾工？足簡單，ah都看佗一工去程上俗、佗一工回程上俗訂落去就著--ah。
前一暝拄對澎湖划船轉來，拜一下晡揹一包行李，用行个去舊phu-luh騎PBike，去車頭坐統聯， 台中休睏一擺，佇中壢落車，坐轉去機場个車。有紮物件來食，佇機場利便店買涼个佮點心，頂遍來桃園機場坐飛機已經是欲20年前，坐去LA彼改。想欲揣所在睏 ，毋過會使倒个所在攏總有人，揣著一liau便所邊个椅仔，the咧休睏。2點55个飛機，猶未一點就去排隊，已經有足濟人teh等矣。
坐到成田是日本時間七點外，佇利便店買sandwich食。無欲直接去東京，來去銚子（唸做tshiò-sih)坐火車，嘛是佇日本齣（宮本から君へ）內底看著个景點。
機場坐去成田閣轉車，外口足熱佇待合室內底吹冷氣，就愛等有人起來才有椅仔通坐。到銚子先出站去外口街仔路lau lau咧才閣轉來買車票，毋過車頭人講先入去等下佇車頂買就會使。月台彼爿有一間足古錐銚子電鉄用--ê車頭。
足古錐干焦兩節火車，佇車頂共生做小細小細古錐錐查某車長買一日卷，先坐到上尾站外川，就是出現佇日本齣內底hit个木做火車頭，出站順巷仔行到漁港斡倒手爿，到底就是長崎鼻，日語佮台語相像，嘛是共捅出去海裡个陸地叫做鼻。轉去外川車頭一班車拄走，愛等成點鐘才閣有車班。
一个oo-ba-sang入來，先佮車頭店員開講，來坐佇我个邊仔，共我ai-sa-tsu，佮伊烏白喋開講規點鐘，一直到車來。
坐到後一站犬吠落車，行去燈塔遐，去鼻太平洋个海味。閣佇觀音站拄著彼个oo-ba-sang，佇車頭內底挈一枝葵扇予我，講這會使挈，是千葉県観光局做个歓迎人客来千葉。一日卷佇遮會使換一个お守り，行去圓福寺，揣著人問，講是愛問行較落去佇彼爿个飯沼觀音。行轉來車頭个半路，有一陣差不多國校四、五年个囡仔，可能相招好欲拍球，停跤踏車个時我拄好經過，其中一个佮我四目相相，無斡頭無閃避，足有禮貌共我ai-sa-tsu "こんにちは"，我嘛共應“こんにちは”。
閣拄著彼个oo-ba-sang，菸食足大，毋知是攏一直佇車頭內底，抑是已經去外口踅一睏轉來矣，佇遮共伊講”さようなら"，直接坐轉去銚子。
坐有夠久才到上野，欲去新御徒町自転車駐車場租跤踏車。是一个oo-ji-sang管 ，tu一張申請表予我寫，欲佇東京一禮拜，選租7工1200￥，倩彩揀一台，是懸手扜仔个tsőo人車。騎去浅草進前訂好个旅館，是khia-phu-se-luh一个人一格，佇櫃台check-in，頭家袂曉念我个羅馬字名，看護照才講oo~朱さん，領一su睏衫、一包齒抿喙鬚剾仔。身軀洗好騎出去踅踅咧，閣去超市買便當食。
写真