神国の旅六日目／第六工

今仔日落雨，無法度騎車，坐電車出去。行猶袂到車頭鞋仔就澹去--矣。
先坐到五反田(ごたんだ；go-thang-tah)，這个車頭誠心適，欲轉都營个地下鉄愛先行入去邊仔个百貨公司个四樓，落去二樓接外口个天橋，才閣落去塗跤个入口。這當然愛先做好功課，因為出門了後就無網路通用，我个手機仔內底閣有先安裝離線嘛會使用个地圖(Maps.me)，牛哥地圖日本地区無通仔下載離線个用，嘛有東京地区電車佮地下鉄的路線圖。

佇五反田駅買1 Day Pass，一張700￥一工內都营个地下鉄電、Ba-suh、荒川線佮日暮里・舎人ライナー在你坐，感覺誠利便閣無貴合台票差不多才百七箍。坐到浅草駅落車，行去浅草寺，大門當teh整修，仝款有夠濟観光客，進前有來過就無入去--矣，主要是欲來看隈研吾設計个浅草文化観光センター，上頂懸層是免銭个展望台(嘛有免銭个wifi)，會使看sky tree，毋閣因為天気無好，攏予雲遮--著，拄著台灣來个鄉親，講南部腔个台語。紲落來行轉去浅草駅坐去藏前，出站行一段路斡過一个路口到仝款藏前駅毋過是大江戶線，坐到若松河田落車，雨落愈大，攑雨傘用行--个感覺嘛袂䆀，遮个地勢毋是攏平--个，落崎peh崎个崎日文叫做坂(さか，sa-khah)，行入去早稲田大学內底，名校个気氛就是無仝款。經過一个敢若是餐廳个所在，想欲入去食飯感受一下仔佇名校食飯有啥無仝，飯看會較芳較好食無?結果彼是像活動中心，有一排一排个桌仔，有利便店teh賣涼个佮點心。出早稲田大学無偌遠就到都電荒川線早稲田駅，一下仔車就來--矣，雖然佇電腦頂已經看足濟擺，毋過現場看嘛是感覺，hóo~有較古錐，共車票予車長看一下就會使上車，毋免過彼个機器。車廂干焦一節爾，有袂少人teh坐，本底欲拆㧒kak个這條路線，好佳哉是在地人个堅持，才有法度保留落，台灣本底嘛有足濟這種市內个路面鐵枝路，攏拆了了--矣，有夠無彩，無嘛毋免走這遠來坐。原底是暗算逐站落車佇附近行行踅踅咧，毋過可能會坐到天暗嘛坐袂到上尾站落車，其實逐站應該攏足好耍，無要緊，後擺猶閣有機會。
坐到"鬼子母神前"落車，鬼子母神是保庇有身个婦人人和囡仔个神，相關个故事會使上網路google。看著遐有通頓印仔，我有攢一本簿仔通頓印仔，到今仔已經頓袂少个--矣。閣坐一站佇雑司ヶ谷落車，遮有佇我个list內底，來參觀墓仔埔"雑司ヶ谷霊園"，其實是欲去看夏目潄石个墓，這內底有袂少有名人个墓，附近个東池袋、鴨巢攏誠好𨑨迌。到大塜駅前斡一个大斡，古錐个電車寬寬仔駛佇路裡佮路裡个車行做伙，真正有夠心適，我無落車直接坐到飛鳥山，遮會使看電車等紅燈。落車隨衝去天橋頂等，開錄影模式共這个心適个情景錄起來。行過公園彼爿，坐單軌"電車"(飛鳥山公園モノレール)去山頂，其實干焦48米，peh17米懸，兩分鐘就到位--矣，遮會使看著荒川線單節个電車佮路裡个車駛做伙踅過飛鳥山。閣上車，坐佇電車內底等紅燈真正有夠趣味，車踅過王子駅，坐到梶原駅落車，遮有一个商店街，聽著坐佇kám仔店頭个開講聲，寬寬仔騎佇路裡个跤踏車，這是在地人个生活。閣坐到熊野前駅落車，迒過鐵枝路行去日暮里舍人ライナー熊野前駅，閣愛peh起去樓頂坐車，因為是高架車佇頂懸走，一直坐到上尾站，坐佇第一排椅仔錄影，無落車原車閣坐轉來熊野前，繼續坐荒川線，坐到上尾站三ノ輪橋駅，嘛是足古錐个車頭，鐵枝路邊種足濟花。經過一間足舊足舊个旅社，規間看起來是柴起--个，進前佇牛哥地圖頂有看著，一暝1200￥，後擺有機會愛來蹛看覓。軁鐵枝路跤來到大路邊，當teh想紲落來欲去佗位，用行--个去sky tree敢若傷遠，看車牌仔(都营)這線有經過浅草，拄好一台bà-suh停倚來，緊坐--起-去，毋免買票因為我有1 day pass。到浅草才坐地下鉄去押上駅，出站後壁就是sky tree，這爾近看，hóo~有夠懸--个，khiàn kah頷頸仔會酸。押上拄好是這條浅草線尾站，會使直接坐到五反田免搬車。
写真

神国の旅五日目／第五工

今仔日是拜二，阿母佮小妹欲坐下晡个飛機轉去--矣，頭一擺共跤踏車拎落去樓跤，怹拖行李箱仔對車頭去，我家己騎車仔去踅，閣有一禮拜个時間佇遮。

往南騎去，嘛是較愛騎海邊仔，風景較媠。其實今仔日才算是真正佇日本个街仔路頂騎車仔，騎佇路个倒手爿，真正鼻著油煙、熁著Bà-suh佮thôo-la-ku燒燒个iân-jín，有个路無畫跤踏車道愛騎佇上外口。横浜体育館足濟人，毋知是teh舉辦啥物活動，斡過去中華街个方向，氣氛就隨轉換，炒菜个油煙味、亂七八糟个看板，若毋是路裡个人講日語，感覺無成佇日本，閣騎去海邊仔个山下公園，看大隻船佮"穿紅鞋个查某囡仔"。軁過高速公路跤過橋就是元町，敢若到另外一个世界，轉來到日本个感覺，逐間店攏足古錐閣有個性。騎過山手磅空就開始peh崎，遮是横浜市南区，是住宅区，厝攏是起佇懸懸低低个山崙，墓仔埔就佇民家厝隔一條路个對面，日本人敢若無彼號禁忌，毋閣怹个墓看起來無遐恐怖，一枝一枝个石柱排kah足整齊，看起來足清氣siùnn。騎過米軍根岸住宅区个入就是足長个落崎，踅過横浜舊市区，佇地圖頂懸顯示一間金刀比羅大鷲神社（ことひら・おおとりじんじゃ），就騎去看覓，照佇網路頂看著拜神社个方法，先洗手漉喙，行去拜殿頭前搝鈴，擲錢行兩擺礼，拍兩下手才閣行一擺礼，誠心適。神社後壁是横浜橋商店街，這應該會使算怹个菜市仔，較早攏是佇日本齣內底看著，這馬總算親身來到位，會使鼻著、聽著真正商店街个気氛。佇FamiMart連網路，因為無辦Wifi機仔，攏愛揣這種免錢--个，暗算攏teh騎車仔應該無閒通用網路，先傳一屑仔相片分享予面友。順大通公園往東騎轉去，欲去看港口个夜景，經過象鼻公園，這是"逃げ恥"个撮影地，共跤踏車鎖佇昭和ビル後壁个樹仔跤，用行--个。好佳哉有紮鎖來，有个所在跤踏車無法度入去，胡白停閣驚仔去夆偷牽去。這个公園應該是有一个足成象鼻个護岸才號名-个，行對大桟橋ふ頭去，這會使坐國際線个大船，這拄好拄著日本丸欲出港，閣有出港儀式，差不多規船个人客攏出來共岸頂个人搧手，一條一條彩色个紙帶對船頂擲落來夠好看，較有力--个閣擲到予岸頂个人接著，船頂岸頂个人攏足歡喜耍做伙。足濟人來遮散步、運動，嘛有袂少人佮我仝款，欲佇遮等天暗通看横浜港个夜景。等兩點外鐘夜景翕了甘願--矣，踅去縣政府閣去赤煉瓦倉庫翕相，經過遊園地看大観覽車佮LandMark Tower騎轉去。
写真

神国の旅四日目／第四工

跤踏車紮來第四工，除了拄到个頭一工下晡有騎一下仔，攏無騎著，囥佇房間內。明仔載阿母佮小妹就欲轉去--矣，今仔佇附近踅，買猶袂買著个物件。第二工佇超商食早頓，閣來就攏佇彼工下暗轉來就去對面超市款食--个，下暗个弁当佮隔工个早頓。
先去踅藥房，閣去踅冊店，出來看著一群上班族應該是出來食中晝，小妹講足成teh拍日本齣，真正有影是日本齣內底會使定定看著个情景。横浜美術館頭前个噴水池teh噴水，足濟囡仔耍kah規身軀澹lì-lok看起來有夠涼。拄仔彼間冊店無小弟寄買个雑誌，閣行去landmark tower个冊店揣，這棟樓是全横浜上蓋懸--个，足捷出現佇日本齣內底。為著配合Pokemon Go後個月佇横浜个活動，會使看著有夠濟Pikachu佮相關个產品。
踅過Cosmo World 遊園地，彼个大観覽車(Cosmo Clock)嘛是横浜港个地標，欲去World Portas，順紲佇遐食中晝，食飽去樓頂，買Lego閣有踅100箍商店。了後散步去赤レンガ(煉瓦)倉庫，這个古蹟是横浜開港就有--个，用紅磚仔起，煉瓦就是磚仔，外觀保留原底个模樣，內底改裝做商場。佇邊仔公園海岸邊椅仔休睏一下仔，坐水上バス(ba-suh)轉去横浜駅東口。小妹閣有物件愛買，踅去車頭樓頂个Lumine，真正有夠厲害，買到上尾仔一工，閣佇樓跤買有夠貴个雞卵糕，切細細一周700￥，店員講一个物件アルコール(a-lu-khoo-lu)，本底聽無，閣想一下仔，啊~當時仔就是alcohol酒精分，翻予小妹聽，才共店員講大丈夫，無要緊！暗頓去超市買，順紲款明仔載个早頓。
写真

神国の旅三日目／第三工

昨方行一工个路跤有夠酸，阮阿母嘛講佇市內踅街無啥趣味，所以今仔日去鎌倉，這有佇我个名單內底。前幾工仔就約好，下暗欲佮日本人个朋友食飯。
坐電車去大船（唸做oofuna），天氣烏陰閣小寡雨霎仔。JR東日本買鎌倉江ノ島PASS，一个人700￥。mono rail對鎌倉坐到江ノ島，佮電車拄好倒反，鐵枝路是佇頂懸，車廂是吊咧，下跤空空會使看著街仔路个車teh走，親像佇遊樂園坐遊園車足心適。
出站敢若無啥物人，一到江ノ島車頭，虎~有夠鬧熱。佇電腦頭前看有夠濟擺，毋閣真正來到遮猶是感覺“哇~這就是江ノ電”。車頭到江ノ島个這條路滿滿个觀光客，當然阮嘛是，閣有足濟足濟真古錐、真有個性个店，逐間攏予人想欲入去踅踅看看咧。那行那食物件散步到江島神社，半路有看著有店teh賣攕規條个瓜仔，一枝60￥，足奇怪个食法。閣有一間江ノ電个專賣店，攏是佮江ノ電有關个產品，逐項攏足古錐。観光案內所个阿桑問阮敢是對台灣來个，可能捌聽過別个台灣來个遊客講台語，佇挑工紮來頓印仔个簿仔頓江ノ島个印仔，就行轉去車頭坐車。
江ノ電上心適个就是腰越這段，電車駛佇街仔路个中央，佮車騎做伙，閣有LED看板提醒電車到位矣，鎌倉高校邊仔个踏切猶是足濟人佇遐等電車過欲翕相，車速無緊硞到鎌倉，買oo-mi-a-geh(土產)个時間。踅去邊仔个御成商店街，禮拜時仔是步行者天国，干焦用行个佮騎跤踏車會使入來，規條街仔攏是足有個性店。轉去到横浜五點四十外分，佮村田さん約六點佇西口，阿母佮小妹去踅街。我捌佇屏東共村田さん上台語課，伊一年差不多有一半个時間攏佇台灣。
暗頓食个是正港个日本料理，頭家有家己个漁船仔。服務小姐講一堆菜名，聽攏無，予村田さん全権處理。一開始是烘細隻魚仔，小跤个烘爐囥佇桌仔頂烘，閣有一項，愛分三改食，開始食上頂懸个菜，過來摻一寡料食第二層，上尾仔共壺湯倒落去攪飯食，成心適个食法，嘛有海胆、蟳仔，閣有足濟項毋知菜名个，這若毋是佮在地人來，真正毋知通點遮个菜，嘛毋知人來這種店。
写真

神国の旅二日目／第二工

今仔日無騎車，坐電車去東京踅街。
日本無早頓店，佇厝裡食無就愛去利便店食早頓。今仔日是踅街个行程，小妹有攢一張shopping list，我嘛有攢一張景點个list。
行路去横浜車頭坐電車，坐到東京車頭，東京駅有佇我个名單內底。東京車頭閣較鬧熱横浜車頭，前幾年才重建好勢。對正門出去，彼个圓形厝頂就足精彩。足濟遊客佇外口廣場翕相。行去對面个KITTE(きって，切手，就是郵票)，這是原底个中央郵便局，這馬改做shopping mall，一樓有一部分保留做郵局，厝樓尾頂會使看規个東京駅佮附近大樓，主要是免銭，暗時仔來一定閣愈媠。
丸の內遮有日本齣个撮影ロケ地，人は見た目が100パーセント，三菱一號美術館，佇彼个窗仔外口翕相个人應該攏是有看彼齣戲。丸の內會使講是東京个Manhattan，雖然我毋捌去過Manhattan。轉去東京車頭地下街食晝，踅幾偌lìn才買一个便當，700￥（差不多180台票），飯有夠少，毋閣成𩚨成好食。地下鉄線路成複雑，入毋著改札口欲出來愛扣一屑仔銭。坐去錦系町，嘛是為著欲去雑貨店（雑貨就是生活用品、文具...）買物件。日本个車頭邊差不多攏有跤踏車駐車場，有地下嘛有人行道邊，騎跤踏車个人足濟，大部分是ママチャリ（ma ma tshia li），看起來是對厝裡騎去車頭囥，才閣坐電車去上班、上課抑是買物件。大路車足濟，毋閣斡入去較小條个路就是住宅區佮各種个店，就變做另外一个世界，行路--个、騎跤踏車--个，速度足慢。路个彼頭就是sky tree，用行--个足久才會到，遠遠看就好。佇lawson買涼--个佮點心食，才閣坐去銀座，為著欲去踅Loft。

出車頭捎無方向揣無銀座个地標，原來是佇頭殼頂，行去對面看較有。差不多上貴个品牌攏有佇遮設點，是講佇地這爾貴个所在會使開賣文具个店，真正有夠厲害。
踅了已經足晏--矣，行去有楽町坐車進前，先去利便店買泡麵欲轉去泡，買了看著一間吉野家就入去食。
写真

神国の旅一日目／第一工

舊年熱人論文个實驗計劃好開始做，到十月收著袂少樣本，毋閣，過來進度就一直牢佇暇。閣有一件代誌，過年去山裡露營，手機仔摔歹去，佮小妹開講講著，挈阮母仔無teh用的手機仔來用就好，修理个錢省起來去日本，順這个勢二月初六機票就共決--落-去，迫家己一定愛佇這學期畢業，當然後手閣經過足濟代誌。
頂回去日本已經是十六年前--矣，自細漢就對日本足有興趣，聽日本歌閣有錄影帶時代个“志村大爆笑”，日本對我來講是一个有夠神奇个所在。差不多三、四年前閣開始看日本齣，會記得是『TOKYOエアポート〜東京空港管制保安部』，日本齣佮日本民族性仝款，劇本頂真情感部分處理足幼路。這改去日本嘛是為著欲揣戲內底个撮影地。所以意思就是，五個月前就開始做功課--矣。
跤踏車前一暝就包好勢，因為阮阿母佮大漢小妹嘛欲去，做伙坐五點半計程車到機場。我个飛機較早就先去報到。頂遍來機場已經成十年前，閣是坐國內線，所以佮第一遍來差不多仝款新鮮。
起飛个時邊仔彼个tshuā囡仔个tsőo人手共椅仔kuainn挽絚絚，看起來足緊張。閣有干焦彼个囡仔就起來放四五改尿，厚尿閣欲坐窗仔位。
兩擺來日本拄好降無仝機場，成田機場有夠大，愛行足遠个路。日本入境愛翕相，閣有掃兩枝指指个指模。去JR東日本買車票，接待佮櫃台小姐英語攏袂䆀，票挈咧綴人行出去，干若毋著，問一个oo-jí-sán才知是頭拄仔買票个對面。Narita Express(略N'ex)成田到東京／横浜來回干焦4000￥，等於一逝才五百捅箍台票，車頂有wifi閣會使充電，嘛有專門囥行李个所在，遮--个對我來講攏足需要，一點48个車，駛無偌久就開始落大雨，出千葉縣雨就停--矣。到隅田川進前就會使看著sky tree(華語翻做晴空塔足奇怪)，第一擺親目睭看著足新奇--个。佇東京車頭頭前節佮後壁節分開，繼續駛去横浜。

一出橫浜个改札，hóo~有夠濟人，佇外口共跤踏車輦仔灌風(上飛機愛漏風無會piāng去)，牽過陸橋過高速道路个另外一爿，往"港未來"(みなとみらい)去，紲落來欲佇遐十二工。
佮拄來日本个台灣遊客仝款，第一件注意著个代誌就是，路夭壽平！先騎去港口、市內踅踅咧，五點外才轉去細漢小妹遐，頭擺看著查某孫仔。暗頓等阮阿母佮小妹到位才佇車頭地下街食。
写真
access: 屏東

 

佇日本騎跤踏車Cycling in Japan

研究所畢業矣，來去日本畢業旅行，紥跤踏車去騎。

坐LCC航空欲另外紥行李愛閣加錢，我个跤踏車差不多十捅公斤，所以另外買15公斤，來回1500-台票。我無用紙箱抑是𠕆kheh仔，就是普通个車袋仔，較好收。

報到个時櫃台會問內底是啥，會佇袋仔tah一張“Fragile”个貼紙，閣一張說明予我簽名，意思是講因為無妥當个包裝，有可能會佇運送个過程中kho傷啥物貨。上好愛有帶仔通揹，行李領了到外口抑是坐其他交通工具閣有一段路愛行。

大概整理一寡重點：

（1）東京抑是横浜市內个路攏有跤踏車道，毋閣國道無（日本个國道會使騎跤踏車），愛騎佇上外口（倒手爿）。

（2）日本个青紅燈第一段是直行佮倒斡，若欲正斡愛等到第二段佮車做伙。我是先直騎到對面，等彼爿青燈才閣行，佮咱遮"待轉"差不多。

（3）日本个車路攏一定有人行道（高架道路當然無），啥物所在行路攏會到，跤踏車會使騎上人行道，毋閣愛讓行路个人。照規定跤踏車佇人行道騎嘛愛照車个方向，毋閣我嘛學日本人貪方便騎正手爿，因為有个路真正有夠闊，欲騎過彼爿愛等足久。

（4）我个活動範圍東京佮横浜附近，攏是市區，台灣騎跤踏車个經驗無法度套用佇遮，像横浜到鎌倉25公里，我就騎超過兩點鐘，因為市區佮市區攏相連，騎一點鐘閣猶袂出横浜市，規路攏teh等青紅燈，凡勢超過一百个以上。横浜到東京閣愈嚴重，路足平車嘛攏守規矩，毋閣速度就是緊袂起來，所以到尾仔我就用車袋仔包起來，坐火車到品川才閣開始騎。

（5）除了高架个高速公路佮有特別規定个地下道（標示攏蓋清楚），其他攏會使騎跤踏車。拜六禮拜有个路段實施"步行者天国"，像銀座、秋葉原，連跤踏車嘛袂當騎，愛落來用牽--个。
(6)跤踏車愛包才會當坐電車，直接過改札口行到月台，遮个電車是teh講一个城市到另外一个城市彼種，若是地下鐵人攏足濟，紮跤踏車去車頂可能會造成別人个困擾

多語台灣

 坐佇台東兒童故事館樹仔頂个籠仔內，聽著這个阿妹仔走uì我邊仔過teh叫“阿兄~阿兄~”(用台語)，共應“阿恁阿兄佇佗位？”，伊就停落來peh入來我這个“籠仔”內佮我開講，就問我講“你嘛講台語喔？”、“阿恁媽媽佇佗位？”，“佇厝啊”我應...，“啥人tshuā恁來”，“爸爸”，“阿恁uì佗位來“,"對面",我應"遐--喔？"（指彼爿），“毋是啦”（指另外一爿），尾仔怹阿兄對隔壁走出來，我就講"阿你攏無出聲你妹仔teh揣--你 "，了後怹兩个就tong、 tong、 tong 走落去--矣。

這對兄妹仔台語講著真輾轉，老父教育有成功，一聽就知影怹佮厝內人个慣用語是台語，毋過佮別个囡仔講話就隨轉過北京語，語碼轉換(code-switching)誠緊，攏無重耽、無閬縫。

騎固定齒仔環島—後手踅踅唸

一寡數字、統計

總路程：超過1000公里，無用mè-tah表，毋知確實个數字

總開銷：1700-箍，修理後壁輦200箍算在內，逐工个食食佮飲料，茶水無開著錢

上懸點：北宜公路540米

經過鄉鎮

第一工：屏東→大寮→鳥松→仁武→楠仔溪→橋仔頭→岡山→阿蓮→仁德→歸仁→新化→新市→善化→麻豆→下營→枊營→新營→鹹水→義竹→朴子→六跤→北港→元長

第二工：元長→褒忠→崙背→二崙→西螺→埤頭→溪湖→埔鹽→福興→秀水→彰化→烏日→台中→潭子→豐原→后里→三義

第三工：三義→銅鑼→後龍→造橋→苗栗→竹南→頭份→香山→新竹→竹北→新豐→湖口→楊梅

第四工：楊梅→埔心→平鎮→大溪→三峽→新店→石碇→坪林→頭城→焦溪→宜蘭→五結→羅東→冬山→蘇澳

第五工：蘇澳→東澳→南澳→和平(秀林)→秀林→新城→花蓮→壽豐

第六工：壽豐→豐田(壽豐)→鳳林→光復→瑞穗→玉里→富里→池上

第七工：池上→關山→鹿野→初鹿(卑南)→台東→太麻里→金崙(太麻里)→大武→達仁→獅仔→楓港(枋山)→加祿堂(枋山)→枋寮→新埤→潮州→竹田→麟洛→屏東

過暝地點：雲林元長國小、苗栗三義僑成國小、桃園楊梅國小、宜蘭蘇澳國小，花蓮壽豐國 小，台東池上福原國小

跤踏車消磨：一條鍊仔(本底就是舊个，轉來拄好換新个)，鋼絲4枝，外奶無啥磨著這馬閣咧使用

裝備：1台固定齒仔跤踏車、1台T2拖車、3軀衫仔褲、1領Hennesy Hammock(吊床)、1跤MRS Dragon汽化爐(無用著)、一跤ha̋ng-góo(無用著)、1跤shower水袋仔、一條ió-bih內奶佮修理跤踏車个家私、1支手機仔、1台平枋電腦(無好紮食電閣傷)、1塊太陽能枋、1篋仔衛生紙、1雙家己做个tarahumara涼鞋(上蓋利便，除了睏攏穿咧，閣毋免洗襪仔)

感想：

騎固定齒仔跤踏車環島真正是討皮疼，雖罔平路蓋好騎，但山路就愛落來牽車，有騎過就好矣。過程中袂講蓋忝，一工騎百三、四公里，上尾仔工較食力騎超過2百公里，阿無算起來是蓋輕鬆，佮行路比起來。誠心適个七工个旅行，嘛算流浪，家己出力騎過个路，會使聽著聲、聞著味，peh崎抑是落崎家己攏知影，這攏是坐車無法度體會著个，已經經過半冬矣，印象猶閣清楚。決定逐年一定愛用上蓋無一禮拜騎跤踏旅行。

騎固定齒仔環島—第七工 池上→屏東

2014／8／22
六點猶未半就上路，佇平交道前拄好去予頭班火車擋著。先去街裡揣物件食，足想欲啉豆奶，揣著一間賣饅頭个店。
七點前就經過南橫个入口，毋過這馬袂通。昨暝佮"替代役"開講，講今仔日天暗若騎無過南迴，可能愛佇大武過暝，毋過一上路就想講今仔日一定愛騎到厝，因為我足想我个眠床啊...。關山進前路邊出現一棟黃色人咧講个"歐洲式"个厝，應該是做民宿，台灣人看著這種厝就強欲起痟，清境農場遐嘛一堆，家己有个煞一直敲予歹，起彼號奇奇怪怪个物件。
八點半較加到鹿野，過鹿野溪橋猶閣是peh崎，閣愛落來牽車。佇初鹿个利便店歇一下食水。九點半入綠色磅空，無閣順台9線，行更生路入台東市，閣來个路就誠熟，十點外佇大同市仔停落來食一碗麪。

騎到底斡臨海路，離屏東156公里，衝...。過知本閣轉來台9，太麻里進前彼个大崎，閣愛落來用牽个，透中晝熱kah欲死，感覺牽超過一點鐘矣。過代天宮就落崎，thân拄仔儉个這馬khe̍h出來用，一直lu到太麻里免啥出力騎，閣入去利便店歇睏。過溪到金崙進前閣是peh崎、起起落落个山路，天氣熱一直想欲食冰个，佇金崙利便店啉一罐涼个。
過橋無偌久拄著一个阿啄仔少年仔，共a̋i-sah-tsuh，就騎做伙，那騎那開講。伊是米美國人，大學生，歇熱來台北學中文，一禮拜前租跤踏車對台北開始騎，兼四界拜訪朋友。看著伊个手扞仔吊一杯涼仔，就共伊講台語个俗語三項對查埔人無好个物件，"薄酒、冷茶、老查X"，伊聽了就欲共茶擲hak-ka̍k，我講"毋免啦，毋是逐个人攏會按呢啦"。閣講著我後學期閣欲去讀冊，伊講怹母仔嘛欲閣轉去學校讀冊，怹母仔差不多我愛叫大姊个年歲。
有人做伙騎就較袂無聊，感覺足緊就到大武，停落來佇利便店食涼仔，閣看地圖討論紲落來个行程，我講騎去屏東愛成百公里，伊想欲騎去恆春還車，我講會使經過牡丹，去遐看看咧食遐个物件。開始peh南迴公路我就閣愛落來牽，伊騎一段就停落來等我，對袋仔內底逐káinn挈無仝的果子出來食，閣請我，我嘛挈昨方抾个柚仔出來擘，一半請伊食，問伊講米國敢有這種果子，伊講這是第一遍食著。欲六點騎到壽峠，南迴公路上懸點，伊欲騎另外一條路屏199，我欲順南迴落山，佇遮講再會，提醒伊天暗矣愛點火，閣留資料會使連絡，欲騎上路想起來，做伙翕相。
七點外出來到楓港，hóo~這四工攏總佇台九騎470公里。過枋山了煞愛睏起來，那騎那盹龜，干焦會記得加䘵祿堂佮水底寮，可能這兩个所在拄好精神過來，看著路況就知影到啥物所在，毋過盹龜罔盹龜，拄著紅燈閣知人停落來，袂tsűn共挵過。真正精神過來是騎新埤經過拍鐵彼條到潮州个外環道，佇利便店頭前停落來，後輦已經斷幾偌枝鋼絲，閣有二十外公里，已經十點外矣。到竹田利便店買飲料啉，啉了繼續huainnh，到厝已經十二點矣，今仔日上硬斗，早仔六點外騎到半瞑十二點，超過兩百公里，結束七工个流浪，下暗會使睏我个眠床啊~

看相片

騎固定齒仔環島—第六工 花蓮壽豐→台東池上

2014／8／21

拄天光猶袂落吊床，就有聽著做運動个人放个音樂。洗喙、洗面、物件少寡款一下，共拖車敨落來，干焦騎車，出去踅踅lau-lau咧，因為這箍lē仔攏是較早日本時代移民仔村，一定有足濟物件通看。

先揣物件食，去車頭前一間日本厝(有新整理過)，足濟人生理敢若袂䆀。食到一半，一个人客袂記得是啥原因佮頭家冤家，彼个頭家嘛真有個性，袂巴結人客，堅持伊著个代誌。有个人就是按呢，幾元仔錢hông趁，就食人到到。食飽踅庄裡，閣有幾偌間日本厝，散掖佇後來才起个厝个中央，有个厝油漆用色足大膽。佮一个烏里桑問講，車頭後壁糖廠遐本來足濟日本厝，毋過攏已經敲了了矣，嘛是踅去看看咧。除了去予thai-ko國民黨挵歹去个遐—个，台灣人就是按呢足奇怪个，棄嫌家己舊个物件，才閣開錢去外國看別人个古蹟、才閣逐年開彼濟錢宣傳觀光，共想看覓咧，彼个攏共留luài，外國人就會相爭欲來看，khái(﹡1)閣需要開錢宣傳。足有日本味个花蓮，煞選一个怨恨日本充滿中國思想个首長，好佳哉遐个人嘛知影觀光是上輕可趁錢个。

轉來國校九點外，看一个老師佇遐用彼个門，開袂開，e̋~敢若是我縛吊床彼扇門？歹勢啦！車牽咧上路，來去豐田看看踅踅咧，看這个名就知影是日本名。遮个路攏是直佮橫个典型日本式个道路規劃。先去文史館看展示，了解一下仔大概。豐裡國小對面日本時代个派出所改做客家生活館，遮有真詳細个地圖，閣共景點編號，照地圖行就袂看落勾去。佮內底个大姐開姐開講，戰後日本人予國民黨趕轉去日本，厝大部分留予對西部請來个工人，足濟是客人，經濟狀況較無好，厝予風颱吹歹去，嘛無法度修理，年久月深就規間歹了了，所以才會看起來攏是後來起个磚仔厝，遐个日本厝算殘留落來个。用行个入去看日本墓仔埔。神社个鳥居閣佇咧，毋閣神社無去矣，改做碧蓮寺，閣有一寡石燈，開庄三十年記念碑，兩隻狛犬嘛有留咧。中晝就佇庄裡遮食炒飯。

想著一步，共猶未焦个衫、褲夾佇拖車个旗杆，予風吹會較緊焦。衫較薄閣是快焦个材質，一下仔就會使提落來，賰一領褲。半路看著龍眼就挽寡來食，毋知騎偌遠去矣，無意看著路裡家己个影，哭父~旗仔賰下半節，頂半節箠仔佮三角旗仔佮我个褲毋知落佇佗位去矣？共拖敨落來囥路邊(台9花蓮段大部分攏有跤踏車專用道)，騎欲半點鐘才抾著，原來出豐田了共衫收起來無偌久就落去矣，因為是別人个物件，愛完整還人。

繼續佇台9向南騎，鐵枝路攏佇邊仔。頂一káinn走這條是足濟年佮女朋友駛車去花蓮tshit-thô，這馬家己一个人用跤踏車騎過心情...毋知欲按怎表達。入去鳳林，佇利便店歇一下仔。過瑞穗猶閣有山路，到北迴歸線標誌已經五點半較加矣。停佇路邊毋知欲提啥去矣，拖車包 開開，煞敧一爿，內底物件攏捙對路邊坎跤落去，好佳哉無蓋深、跳luè抾khài。經過一giah攏柚仔園舞鶴附近，路邊有一粒柚仔看起來是拄挽个，共抾khài收入去袋仔內。玉里進前天就暗矣，共電火鬥好。揣無麪擔仔，攏是像食酒攤彼種个，佇𥴊仔店啉一罐汽水閣上路。

過玉里開始颯雨，一陣一陣。騎毋知人停，九點外到池上，腹肚足枵，食一碗麪，順紲問國校佇佗位。過鐵路，揣著褔原國小，奇怪khài毋是池上國小。內底放空城，問佇涼亭仔耍手機仔个少年仔，報我去過路彼棟宿舍揣"替代役"。叫我等一下，拄身軀洗好。共我案內好就閣轉去房間。先充電，嘛是去便所洗身軀，揣兩欉樹仔縛吊床，才閣騎出去利便店啉bì-luh。
*1阮屏東人共"哪會"講做"khái" 

看相片

騎固定齒仔環島—第五工20140820蘇澳→蘇花公路→花蓮壽豐

2014/8/20

六點外醒，是好天！先看一下仔面冊頂頭自頂禮拜就開始追蹤个"蘇花公路即時路況"。

今仔日早頓食較濟，閣紮一塊餅欲佇路裡食。昨方足暗才到位，下早仔食飽就欲走矣，頂擺來是十外年前个代誌矣，蘇澳對我來講那親像來到外國，規个氣味、氣氛連台語就無啥仝，佇台灣這種小型个鄉鎮才是上趣味、通拜訪个所在，有外地無个有形、無形个資產，保持落去才是永久个，一直開發死較緊！恁有足濟大都市無个物件啊！

七點外到蘇花公路起頭，LED ka̋ng-páng(看板)顯示路裡个路況、天氣遮个資訊。日頭已經會咬人矣，一開始个崎就落來牽車。差不多攏咧牽車較濟，大台tho-lah-kuh經過搧著小寡會搟[hián]，像一隻一隻个怪獸佇路裡咧衝。遮个海佮西部个海無啥仝，是足深足深个藍色。第一个庄頭是東澳，先去加油站清一下仔胃腸，閣去利便店吹冷氣降溫。

好哉佳有鬥頭前擋仔，落崎个時我共跤架佇後壁(因為是固定齒仔跤踏車，跤踏仔袂停得)，放心仔放予lu，可能是拖車个關係，感覺後壁有人佇鬥捒，毋過上崎就艱苦矣，踏無三下一定愛落來用牽个。

拄著對向顧路个車友，過去問看覓敢有需要鬥相共，是少年仔騎車仔環島，老父騎烏肚䆀綴，半路閣佮一个香港來个車友，破輦爾好處理。無偌久看著一个少年仔用行个，講伊前一工對崇德到和平48公里早仔行到暗時，相連紲行十二點鐘，等下新澳磅空有工程封一爿，工程人員會放予我過。真正到磅空進前，指揮交通个工程人員就共擋車个"街路筍"徒開予我過，新澳磅空分兩空，這爿較細空干焦一線，除了停佇半路一台工程車，規條攏我个，寬寬仔騎，內底有夠涼，有个所在閣咧滴水。

中晝頓佇南澳食，食飽共頭家討水，頭家講無水，叫我去邊仔戶政事務所入，了後就去利便店歇睏，盹龜一下。過南澳溪順山勢斡正手爿，頭殼頂有工程咧做，後擺路攏走高架。過武塔了後又閣開始牽車，感覺牽超過一點鐘遐爾仔久，足無簡單路較平矣，對山剖開，出去就看就海，心情嘛開去矣，愈騎愈緊。過漢本落崎，軁過澳花磅空，過橋个時看著一个行佇對面佮我仝向个少年仔，有佇網路頂看著伊，講今仔欲行到和平。佇公所借入一下仔茶，過鐵枝路閣peh崎入和平磅空佮和仁磅空，便若拄著溪仔就是落崎，過溪閣peh崎。有个磅空較狹，大台tho-lah-kuh對邊仔差不多三十公分搧過，若欲騎遮一定愛有電火，予車看會著你。來到"太魯閣國家公園"个石碑，已經四點外矣，停落來歇睏，閣拜託別人共我翕一張相。

就按呢起起落落，過磅空、出磅空，有時仔離海面攏歸百米，經過有名个清水斷崖，閣有兩、三个磅空，過崇德落平地蘇花公路就算騎了矣早仔七點外拚到下晡五點外，差不多一半是用牽个。

uê騎車仔環島个人共蘇花公路想kah足危險，毋敢騎，坐火車過，這是真無彩个代誌，世界級个風景neh！其實啥物代誌攏有一定个風險，會驚蹛厝睏就好啊，我感覺東方人攏欠缺西洋人彼種冒險个精神。有機會一定會閣來，毋過buài閣騎單速固定齒仔，愛有變速，上蓋無崎愛peh會起去。

過立露溪—黃金之河，就是新城。拄著一个騎公路車个車友，在地人，講是出來運動。開講一下仔，哇~破輦，叫車友先行，我佇路邊補輦。手烏烏去邊仔徛家借洗手，毋過攏叫無人，就家己動手。六點半較加入花蓮市，停青紅燈看對面有一个名真趣味个高中叫"海星"。七點外佇花蓮高工門口停，腹肚足枵，入去一間越南查某頭家開个"燒臘"，因為我無食有跤个動物，問頭家講肉敢會使換其他个菜，"當然會使"，攏總予我五項菜，添飯个時頭家一直添閣一直問按呢敢有夠，結果捀一盤尖kah若山个飯菜，阿閣有一種hông攪飯个料，有葱仔、薟椒仔佮其也毋知是啥物件，問頭家，緊持bua̋i講伊个秘方。伊个紅茶嘛有夠芳，我个茶罐仔欲五百CC，栽兩罐較加，欲走進前閣共入予滇，這頓食一下真正有粗飽。

紲落來花蓮市就無停，一直騎。尾仔想著有一个所在放袂記得去矣，就是吉安个"慶修院"(吉野布教所)，是講暗bong-bong嘛看啥，閣暗時嘛關門矣。就按呢一直騎、一直騎，速度應該攏有超過三十，吉安過木瓜溪就是壽豐，九點外(今仔日對早起七點騎到下暗九點，當然有歇睏)騎到壽豐國小，共佇辦冰室的烏里桑問借過瞑，講愛留資料，簿仔頂干焦這个歇熱就有四、五个，閣愛影印証件，阿伯袂曉用影印機，我家己印家貼。烏里桑講愛睏佗位家己揀，毋過袂使開教室。學校邊今仔拄好有商展(這種一禮拜來一擺、兩擺个叫商展，固定式个才叫夜市仔)，足吵，烏里桑講十點過就收矣。物件囥咧，先去便所洗身軀，這个時陣沖水袋仔就足好用。洗好就用行路去外口利便店啉一罐仔bì-luh，因為這兩工攏有通仔充電，平枋電腦就放心仔提出來用，傳相片、佮朋友交流一下。啉了商展嘛差不多欲煞矣，轉去就共吊床縛佇兩欉樹仔中央，入去嘛毋知倒偌久，咧欲睏去矣，哭枵！落雨！緊共吊床敨落來，披个衫褲佮物件收入來亭仔跤，用一晡吊床毋知欲按怎吊，到尾仔一頭縛佇花台邊个鐵架仔，別外一頭縛佇教室門个門杆，tsűn按呢睏。

看相片

騎固定齒仔環島--第四工20140819桃園楊梅→宜蘭蘇澳

 2014／8／19

半暝仔有落過雨，天小寡涼冷閣鳥陰烏陰。昨方洗好个衫閣足澹，包佇ga-lá-suh橐仔lìn。已經有真濟人來學校內底運動，警衛室的門關个，驚共攪吵著就無挵門。七點佇大路邊的店食早頓，出來騎車顛倒食較少，三頓以外無食點心嘛袂講蓋枵，睏眠嘛較正常。

食飽順台1向東行，過埔心車頭轉南平路，進入平鎮。七點外是上班時間，所有个大、細隻車、烏肚䆀齊出動，方向攏差不多，攏是欲對台北去，幾十公里以內可能干焦我一隻跤踏車，佇車陣內底軁來軁去。真正是䆀所在，有夠齷齪，佇台北食頭路買袂起台北个厝就買對遮來，用路裡个時間來換，台北附近个城市攏變成伊个衛星。

桃112接台3，騎一下仔接台4，沿大漢溪落一个大崎，好佳哉有鬥頭前擋仔。過橋就到大溪，走台3猶閣愛peh崎，44-18齒700C个固定齒仔愛足出力才khàng會起去，佇一間寺暫停入水。三峽進前開始落崎，轉新北110，猶閣是一直peh崎，到上懸點落新店前khah電話予台北个朋友。新店就有"台北味"啊，過碧潭大橋就是新店，去應該是菜市仔食一碗麪，欲上北宜進前先去利便店傳一下相片，佇遮放四工來第一擺X。北宜足濟年前捌行過，毋過攏無印象去矣。

頭起先閣有法度騎，愈來愈崎就愛落來用牽个。十二點半才騎十幾公里，佇一間廟仔歇睏。佮一个阿伯仔開講，講伊逐工攏會起來飼幾偌十隻狗仔，這條路啥物所在有幾隻伊攏知，共叫狗仔就落來，食了就自動轉去。就按呢那騎那牽，其實用牽个時間較濟，來到一間咖啡店，叫"卡拉瓦里"，有提供予車友免費入茶，騎到北宜上懸點雲海國小開始颯雨，騎無偌久就到足有名个海倫咖啡，佇遮等一下仔才繼續騎。落到坪林食一盤茶油麪線做點心。五點半過新北宜蘭kap界，會使看著蘭陽平洋个海岸線矣，落有名个九彎十八斡，但我个後輪又閣斷一支鋼絲，過彎一直幌。過一个彎就看著遠遠佇海裡个龜山島，愈來愈大隻，六點外出北宜公路頭城路口。

礁溪真鬧熱人車攏有夠濟，佇宜蘭路邊自助餐食晚頓，食飽繼續行，二結、羅東(無時間去踅夜市仔)、冬山，有時仔足久攏我一台跤踏車佇路裡，暗bong-bong、惦tsu-tsu，干焦風搧過耳邊个聲。老父敲電話來，叫我講量早歇睏，我講毋過明仔載足硬斗，所以一定愛騎到底。九點外到蘇澳，去利便店啉一罐Bì-luh，閣問看附近个學校，先去蘇澳國小，踅一晡毋知欲問啥人，閣轉去利便店，報國中佮蘇澳海事、較遠有士敏國小。蘇澳國中揣無人通問，蘇澳海事講袂使，閣轉去國小，這个時陣閣開始落雨矣，煩惱明仔載。問著一个囡仔，揣著"替代役"，共我講佗位會使利用就轉去伊个房間，可能定定有人來借所在過暝个款。想欲tshu塗跤，按怎撨攏撨袂好勢，到尾仔一頭縛樓梯、一頭縛欄杆。雖然落雨嘛是共衫洗洗咧，到十一點外才睏，今仔是上暗睏个。

看相片