神国の旅九日目／第九工

今仔日無想欲騎車仔，來去都厅，對横浜10番月台坐湘南新宿ライン直接坐到新宿駅。新宿聽講是全世界上大个車頭，插插插个人。佇横浜駅坐足濟工个電車，已經差不多足慣勢、足自然--个-矣，先google看好乗換案內，因為出門就無網路，真正無法度--矣就愛開喙問--人。
用行--个到都厅，這khoo-lê-á足濟超高層个大樓，行到位是都厅个2樓，欲去展望台个電梯愛落去一樓，先去北塔，排隊検查行李，電梯足緊就到45階，欲去南塔愛落去坐另外一台電梯，閣安全検查一改，頂懸有wifi，開一下仔直播，分面友看風景。拄著幾个台灣來--个觀光客，佮一个台灣來--个案內志工，是美濃人，會曉台語，已經佇日本蹛幾偌十年，退休--矣，紹介會使看著遠--个、近--个建築佮所在予我知。這棟都厅是二十外年前，日本経済當好个時起--个，為著表現東京都个気勢，案內志工按呢講。
想欲去下北沢，佇地図看起來敢若無蓋遠，行轉去新宿駅，揣無路線図通看，去問車頭个人，講愛去對面坐小田急，落去到月台，雙爿攏有車班，干焦看車廂寫个地名嘛毋知愛坐佗一爿个車，問車頭个人才知。小寡teh落雨，到位个時雨停--矣，下北沢个"下"是唸做"si-moh"，進前捌聽過這个所在，閣在有teh逐這齣戲"下北沢ダイハード"(テレビ東京)，完全佮地方結合个戲，有夠厲害个片頭佮片尾，所以想欲來遮看覓。佇FamiMart買一个特價个飯丸食，一粒100箍，比台灣个閣較俗。規区攏是誠心適、誠趣味，有特色个店，嘛因為是拜六，有夠済人teh踅，遮个特色是有足済古着店、二手店，劇場，閣真正有一間店門口玻璃有搭下北沢ダイハード个海報，嘛有揣著佇冊裡看著个農民咖啡店，毋過無入去，干焦一个人無足想欲入去坐，翕一下相就離開，因為天気烏陰猶未尾暗仔就暗--矣，一間一間店攏開電火，規个気氛攏出來矣，開錄影共彼種感覚錄--起-來，開始落雨，閣想欲踅較久--个，無法度，衝轉去車頭坐車，到新宿才閣乗換坐JR个車轉--去。
写真

神国の旅八日目／第八工

今仔日騎去東京，來去看東京塔(Tokyo Tower)。往北過みなとみらい橋，倒斡過國道1號閣軁過鐵枝路跤走1號國道(第二京浜)上北。日本个國道會使騎兩輦車(跤踏車佮oo-tóo-bái)，毋過無畫慢車道愛儘量騎較外口。路裡不時會看著oo-tóo-bái，當然無台灣遐爾濟，跤踏車大部分攏是ママチャリ(ma-ma tshiá-lih)，就是佇厝附近騎--个，嘛有拄著幾个仔是騎遠途--个。
東京都佮横浜市市区是連做伙--个，規路紅燈有夠濟，行--个停--个速度攏緊袂起來，過五反田小寡正斡，佇慶應大学停紅燈，斡過了紅色--个東京塔就出現佇路个彼頭。對停車場邊仔个小路仔入去，雖然才看過sky tree，嘛是感覺東京塔有夠懸--个，共車鎖佇公園邊，落去公園內，佇水道頭承水來啉，閣共茶壺貯予滇，有夠利便水道水會使直接啉，佇椅仔休一下仔才閣起行，閣佇塔下跤補翕幾偌張相。想欲去渋谷，東京塔佇港区，愛向西騎去渋谷，騎過麻布十番（あざぶじゅうばん），遮是高級住宅区，地形是起起落落个小山崙，peh起去牛坂，閣斡過去接大路(六本木通り)，一直騎到渋谷个路口，共跤踏車鎖欄杆，入去踅冊店（山下），尾仔轉來以後看新垣結衣演--个Smile主角佇這間冊店相拄，佇天橋頂識悉。遮个路攏有畫跤踏車道，騎過大路去八公銅相彼个路口，這應該是全世界上鬧熱个路口，八公个銅相仝款有夠濟人teh翕相，其實八公个故事牽牽咧佮屏東嘛有關係。想欲去Loft行毋著方向，看地圖才知，共車仔鎖佇後壁巷仔內，對一樓入去，買一枝万年筆佮一台免釘仔个釘冊機，開1600箍￥，買了就走無閣踅落去。車仔牽--咧用行--矣佇附近踅踅--咧，行109邊仔彼條路，peh崎起去，接去大路玉川通り(六本木通り過渋谷名變做玉川通り)。向西騎到世日谷个三軒茶屋，去坐東京个兩條路面鐵枝路个其中一條，世田谷線。先看著すずらん通り，共騎入去，遮嘛是日本齣東京女子図鑑第二話个撮影地，踅透透揣無所在通停車，路邊攏有停規排跤踏車，毋過嘛有告示講袂使停會拖走，踅一下仔共車仔鎖佇細條巷仔邊仔个電火柱，用行个去坐車。車頭个人看我相來相去過來問我，講欲買"世田谷散策きっぷ(散步車票)"，大人一張330￥，嘛是一節足古錐个車廂，佮荒川線个車廂比起來較有科技感，若林駅進前个踏切無遮断機，電車愛照青紅燈，青燈才會當行，遮嘛是一个景點，誠心適。坐到松陰神社前駅落車，佇附近行行踅踅--咧，規个社区足清氣siùnn，路無蓋闊毋過足平，人--攏用行--个較濟，有个騎跤踏車，無khuàinn騎oo-tóo-bái--个，嘛足少看著超過兩樓个厝，應該是社区活動中心个款，嘛整理kah像咖啡厅，閣有印kah足媠、紹介足詳細个社区散策buh-kuh。

坐到終點站，行出外口佇鐵枝路邊等翕電車出站，我頭拄仔坐个彼台車原車回頭載客，落車佮上車uì無仝爿个門。閣轉去車頭坐車，佇松原落車，鐵枝路邊是Next Girl Meets Tokyo(第二話，フジテレビ)个撮影地，逐集無仝个女主角，無仝个所在做舞台。逐站攏袂少人上車落車，表示這條路線猶閣有足濟人teh使用。直接坐到頭一站落車，入去車頭這棟大樓个上頂懸層26階，是室內个展望台，無料，會使看規个世田谷区，邊仔是咖啡厅，會使點一杯咖啡那啉那看風景，這棟大樓叫做Carrot Tower，紅菜頭大樓，足古錐个名，因為外壁个thài-luh个色水，當地个高校生共號名--个，有收佇東京デートナビ(東京約會案內)夜景類內底。欲牽車个時拵閣揣一下仔，細條巷仔斡來斡去足複雑，轉去閣愛三十外khí-looh个路愛騎，轉去玉川通り接318環七通り，半路看著龍雲寺花園盆踊り大会个會場，足濟攤仔來排中央舞台搭好--矣，毋過彼是下暗个活動，接1號国道落南，愛先軁過1號下跤過彼爿，才閣peh交流道上1號国道，騎跤踏車peh交流道有夠趣味个經験。
写真

神国の旅七日目／第七工

今仔日騎車仔來去湘南，前幾工是坐車去，用騎--个會使去較濟所在。早頓食了嘛是摸到九點外才出門，天氣小寡烏陰。横浜佮鎌倉相接，規片攏是算市区，規路攏一下仔就紅燈一下仔就紅燈，足少會使騎10分鐘以上免落馬，已經騎規點鐘-矣猶閣佇橫浜市內，25 khí-looh个路程，到鎌倉已經11點--矣。
過北鎌倉車頭一塊仔，倒手爿鐵枝路邊有一座橋，看起來是神社頭前彼種，斡入去看覓，共車牽過橋、鐵枝路停佇路邊，是一間寺叫円覺寺，peh樓梯起去入大門就欲行入去，內底个oo-bá-sáng共我喝“すみません”，原來是愛拆票，共講歹勢無欲入去，出來了沿鐵枝路騎，拄好有火車經過，佮火車騎做伙誠心適，閣轉去騎國道21號，規路攏落崎，一下仔就到鶴岡八幡宮，邊仔个停車場小路仔停一排跤踏車，看起來有一段時間無騎--矣，共車仔鎖佇鐵網仔用行--个去參觀鶴岡八幡宮，遊客有夠濟，拝殿愛peh足懸个樓梯起去，我嘛綴人抽一支籤。內底嘛有稲荷神社，規排个紅色鳥居，頭前有兩隻狐狸teh顧，參觀一下仔、翕一寡相就轉去騎車仔。看到邊仔有一支風抽，想講進前是用手灌--个無遐飽，歹勢借用一下，結果騎落去一下仔，消風~，閣騎轉去遐灌。騎入去鎌倉街裡，aa...閣消風个，離彼个停車場已經有一塊仔，用細枝風抽灌，尾手閣停落來灌幾偌擺，peh一个仔崎到財洗弁天，學別人共錢囥佇細跤kám仔內底，用khat仔舀水來淋，日本人个觀念佮咱無仝，洗過个銭愛好好仔開出去，按呢才會有財運來。出財洗弁天个磅空輦仔个風消了了，用牽--个，佇街裡踅踅咧，去看進前佇冊裡看著个店，小町通り商店街插插插个人有夠鬧熱。一直牽毋是辦法，轉去閣愛二十外公里，佇路邊揣一个袂共別人鎮著路个所在，拆輦仔，內奶、外奶巡巡咧，無破嘛無刺仔啥物貨仔，無法度，閣鬥轉去、灌風，過來攏無閣消風，真正有夠怪奇。離開鎌倉進前閣順紲去參觀佇冊裡看著个鎌倉中央食品市場佮農協連即売所，差不多是菜市仔个款，毋閣較清氣，賣个菜攏是當地个小農種--个。插過311號路經過由比ヶ浜街仔路，遮个厝逐間攏有夠媠閣足有個性，應該攏無俗。
佇遮斡騎出去大路，想欲佇Daisy's Cafe啉咖啡，猶袂開，轉來有經過才閣來。騎一下仔斡入去32號路，較無車，規路那騎那翕相，過力餅家老店無偌久開始peh崎，騎到極楽寺進前个五木商店休睏，賣一枝枝仔冰，oo-jí-sáng看我四界相，共我講糞埽桶佇遐，手閣那比，去邊仔一間足舊个厝亭仔跤食，気氛有夠讚，食煞閣去極楽寺翕相。沿這條路一直騎落去，有時仔鐵枝路佇正手爿、有時仔佇倒手爿，過稲村ヶ崎駅一塊仔就是海菜寺，毋過彼毋是寺是一間餐廳，去年九月个電視劇好きな人がいること(フジテレビ)个撮影地，餐廳佇半山腰愛行一段樓梯起去，干焦佇門口鐵枝路邊翕相。閣接出去海邊仔个大路，其實嘛無蓋大條算兩線道爾，騎一下仔感覺倒手爿跤踏仔怪怪，結果規枝腿落落去，趕緊停車抾起來，好佳哉規條路teh塞車，才無去予後壁車挵著个危險，牽去路邊用機司鎖予絚繼續騎，佇路邊7-11買一罐bì-luh啉，佇利便店買菸酒店員攏會要求人客佇銀幕頂揤一下，確定買个人有18歲以上。閣騎一下仔就到鎌倉高校前个踏切，已經有足濟人佇遮等欲翕火車經過，共車停好嘛落去做伙等火車，前幾工是佇火車內看出去，這馬是佇遮看火車經過，誠心適，過幾偌班火車翕過癮--矣，閣上車繼續騎，綴鐵枝路斡入去腰越，江ノ電个鐵枝路起佇街仔路正中央，路裡个車佮火車駛做伙，毋過遮是火車優先，，車teh欲到進前led个指示牌會通知，閣會有管理員出來指揮。遠遠拄好一台火車來，kha-mé-lah開錄影，上車騎起行，逐到轉斡个所在，有夠心適，今仔日攏總逐兩擺火車。閣去看一間佇牛哥地圖看著个跤踏車店，有夠舊有夠舊个看板，是用油漆畫佇鐵鉼彼種看板，本底是想講有啥寶通挖無，毋過干焦是一間普通个跤踏車店。回頭閣去鎌倉高校前駅看一下仔海，半路看著青黃个火車駛過來，有夠古錐，嘛是擋袂著停落來翕幾偌張相，經過彼間咖啡店，已經teh欲五點--矣，就無入去，順海邊仔這條路一直騎，佇海浜公園翕彼台舊車廂，斡21號路騎轉去，佮23號相接个所在無斡騎過頭，入去一間薬房踅，出來感覺怪怪，看地圖才知行毋著路--矣，轉去到位已經八點。
写真

神国の旅六日目／第六工

今仔日落雨，無法度騎車，坐電車出去。行猶袂到車頭鞋仔就澹去--矣。
先坐到五反田(ごたんだ；go-thang-tah)，這个車頭誠心適，欲轉都營个地下鉄愛先行入去邊仔个百貨公司个四樓，落去二樓接外口个天橋，才閣落去塗跤个入口。這當然愛先做好功課，因為出門了後就無網路通用，我个手機仔內底閣有先安裝離線嘛會使用个地圖(Maps.me)，牛哥地圖日本地区無通仔下載離線个用，嘛有東京地区電車佮地下鉄的路線圖。

佇五反田駅買1 Day Pass，一張700￥一工內都营个地下鉄電、Ba-suh、荒川線佮日暮里・舎人ライナー在你坐，感覺誠利便閣無貴合台票差不多才百七箍。坐到浅草駅落車，行去浅草寺，大門當teh整修，仝款有夠濟観光客，進前有來過就無入去--矣，主要是欲來看隈研吾設計个浅草文化観光センター，上頂懸層是免銭个展望台(嘛有免銭个wifi)，會使看sky tree，毋閣因為天気無好，攏予雲遮--著，拄著台灣來个鄉親，講南部腔个台語。紲落來行轉去浅草駅坐去藏前，出站行一段路斡過一个路口到仝款藏前駅毋過是大江戶線，坐到若松河田落車，雨落愈大，攑雨傘用行--个感覺嘛袂䆀，遮个地勢毋是攏平--个，落崎peh崎个崎日文叫做坂(さか，sa-khah)，行入去早稲田大学內底，名校个気氛就是無仝款。經過一个敢若是餐廳个所在，想欲入去食飯感受一下仔佇名校食飯有啥無仝，飯看會較芳較好食無?結果彼是像活動中心，有一排一排个桌仔，有利便店teh賣涼个佮點心。出早稲田大学無偌遠就到都電荒川線早稲田駅，一下仔車就來--矣，雖然佇電腦頂已經看足濟擺，毋過現場看嘛是感覺，hóo~有較古錐，共車票予車長看一下就會使上車，毋免過彼个機器。車廂干焦一節爾，有袂少人teh坐，本底欲拆㧒kak个這條路線，好佳哉是在地人个堅持，才有法度保留落，台灣本底嘛有足濟這種市內个路面鐵枝路，攏拆了了--矣，有夠無彩，無嘛毋免走這遠來坐。原底是暗算逐站落車佇附近行行踅踅咧，毋過可能會坐到天暗嘛坐袂到上尾站落車，其實逐站應該攏足好耍，無要緊，後擺猶閣有機會。
坐到"鬼子母神前"落車，鬼子母神是保庇有身个婦人人和囡仔个神，相關个故事會使上網路google。看著遐有通頓印仔，我有攢一本簿仔通頓印仔，到今仔已經頓袂少个--矣。閣坐一站佇雑司ヶ谷落車，遮有佇我个list內底，來參觀墓仔埔"雑司ヶ谷霊園"，其實是欲去看夏目潄石个墓，這內底有袂少有名人个墓，附近个東池袋、鴨巢攏誠好𨑨迌。到大塜駅前斡一个大斡，古錐个電車寬寬仔駛佇路裡佮路裡个車行做伙，真正有夠心適，我無落車直接坐到飛鳥山，遮會使看電車等紅燈。落車隨衝去天橋頂等，開錄影模式共這个心適个情景錄起來。行過公園彼爿，坐單軌"電車"(飛鳥山公園モノレール)去山頂，其實干焦48米，peh17米懸，兩分鐘就到位--矣，遮會使看著荒川線單節个電車佮路裡个車駛做伙踅過飛鳥山。閣上車，坐佇電車內底等紅燈真正有夠趣味，車踅過王子駅，坐到梶原駅落車，遮有一个商店街，聽著坐佇kám仔店頭个開講聲，寬寬仔騎佇路裡个跤踏車，這是在地人个生活。閣坐到熊野前駅落車，迒過鐵枝路行去日暮里舍人ライナー熊野前駅，閣愛peh起去樓頂坐車，因為是高架車佇頂懸走，一直坐到上尾站，坐佇第一排椅仔錄影，無落車原車閣坐轉來熊野前，繼續坐荒川線，坐到上尾站三ノ輪橋駅，嘛是足古錐个車頭，鐵枝路邊種足濟花。經過一間足舊足舊个旅社，規間看起來是柴起--个，進前佇牛哥地圖頂有看著，一暝1200￥，後擺有機會愛來蹛看覓。軁鐵枝路跤來到大路邊，當teh想紲落來欲去佗位，用行--个去sky tree敢若傷遠，看車牌仔(都营)這線有經過浅草，拄好一台bà-suh停倚來，緊坐--起-去，毋免買票因為我有1 day pass。到浅草才坐地下鉄去押上駅，出站後壁就是sky tree，這爾近看，hóo~有夠懸--个，khiàn kah頷頸仔會酸。押上拄好是這條浅草線尾站，會使直接坐到五反田免搬車。
写真

神国の旅五日目／第五工

今仔日是拜二，阿母佮小妹欲坐下晡个飛機轉去--矣，頭一擺共跤踏車拎落去樓跤，怹拖行李箱仔對車頭去，我家己騎車仔去踅，閣有一禮拜个時間佇遮。

往南騎去，嘛是較愛騎海邊仔，風景較媠。其實今仔日才算是真正佇日本个街仔路頂騎車仔，騎佇路个倒手爿，真正鼻著油煙、熁著Bà-suh佮thôo-la-ku燒燒个iân-jín，有个路無畫跤踏車道愛騎佇上外口。横浜体育館足濟人，毋知是teh舉辦啥物活動，斡過去中華街个方向，氣氛就隨轉換，炒菜个油煙味、亂七八糟个看板，若毋是路裡个人講日語，感覺無成佇日本，閣騎去海邊仔个山下公園，看大隻船佮"穿紅鞋个查某囡仔"。軁過高速公路跤過橋就是元町，敢若到另外一个世界，轉來到日本个感覺，逐間店攏足古錐閣有個性。騎過山手磅空就開始peh崎，遮是横浜市南区，是住宅区，厝攏是起佇懸懸低低个山崙，墓仔埔就佇民家厝隔一條路个對面，日本人敢若無彼號禁忌，毋閣怹个墓看起來無遐恐怖，一枝一枝个石柱排kah足整齊，看起來足清氣siùnn。騎過米軍根岸住宅区个入就是足長个落崎，踅過横浜舊市区，佇地圖頂懸顯示一間金刀比羅大鷲神社（ことひら・おおとりじんじゃ），就騎去看覓，照佇網路頂看著拜神社个方法，先洗手漉喙，行去拜殿頭前搝鈴，擲錢行兩擺礼，拍兩下手才閣行一擺礼，誠心適。神社後壁是横浜橋商店街，這應該會使算怹个菜市仔，較早攏是佇日本齣內底看著，這馬總算親身來到位，會使鼻著、聽著真正商店街个気氛。佇FamiMart連網路，因為無辦Wifi機仔，攏愛揣這種免錢--个，暗算攏teh騎車仔應該無閒通用網路，先傳一屑仔相片分享予面友。順大通公園往東騎轉去，欲去看港口个夜景，經過象鼻公園，這是"逃げ恥"个撮影地，共跤踏車鎖佇昭和ビル後壁个樹仔跤，用行--个。好佳哉有紮鎖來，有个所在跤踏車無法度入去，胡白停閣驚仔去夆偷牽去。這个公園應該是有一个足成象鼻个護岸才號名-个，行對大桟橋ふ頭去，這會使坐國際線个大船，這拄好拄著日本丸欲出港，閣有出港儀式，差不多規船个人客攏出來共岸頂个人搧手，一條一條彩色个紙帶對船頂擲落來夠好看，較有力--个閣擲到予岸頂个人接著，船頂岸頂个人攏足歡喜耍做伙。足濟人來遮散步、運動，嘛有袂少人佮我仝款，欲佇遮等天暗通看横浜港个夜景。等兩點外鐘夜景翕了甘願--矣，踅去縣政府閣去赤煉瓦倉庫翕相，經過遊園地看大観覽車佮LandMark Tower騎轉去。
写真

神国の旅四日目／第四工

跤踏車紮來第四工，除了拄到个頭一工下晡有騎一下仔，攏無騎著，囥佇房間內。明仔載阿母佮小妹就欲轉去--矣，今仔佇附近踅，買猶袂買著个物件。第二工佇超商食早頓，閣來就攏佇彼工下暗轉來就去對面超市款食--个，下暗个弁当佮隔工个早頓。
先去踅藥房，閣去踅冊店，出來看著一群上班族應該是出來食中晝，小妹講足成teh拍日本齣，真正有影是日本齣內底會使定定看著个情景。横浜美術館頭前个噴水池teh噴水，足濟囡仔耍kah規身軀澹lì-lok看起來有夠涼。拄仔彼間冊店無小弟寄買个雑誌，閣行去landmark tower个冊店揣，這棟樓是全横浜上蓋懸--个，足捷出現佇日本齣內底。為著配合Pokemon Go後個月佇横浜个活動，會使看著有夠濟Pikachu佮相關个產品。
踅過Cosmo World 遊園地，彼个大観覽車(Cosmo Clock)嘛是横浜港个地標，欲去World Portas，順紲佇遐食中晝，食飽去樓頂，買Lego閣有踅100箍商店。了後散步去赤レンガ(煉瓦)倉庫，這个古蹟是横浜開港就有--个，用紅磚仔起，煉瓦就是磚仔，外觀保留原底个模樣，內底改裝做商場。佇邊仔公園海岸邊椅仔休睏一下仔，坐水上バス(ba-suh)轉去横浜駅東口。小妹閣有物件愛買，踅去車頭樓頂个Lumine，真正有夠厲害，買到上尾仔一工，閣佇樓跤買有夠貴个雞卵糕，切細細一周700￥，店員講一个物件アルコール(a-lu-khoo-lu)，本底聽無，閣想一下仔，啊~當時仔就是alcohol酒精分，翻予小妹聽，才共店員講大丈夫，無要緊！暗頓去超市買，順紲款明仔載个早頓。
写真

神国の旅三日目／第三工

昨方行一工个路跤有夠酸，阮阿母嘛講佇市內踅街無啥趣味，所以今仔日去鎌倉，這有佇我个名單內底。前幾工仔就約好，下暗欲佮日本人个朋友食飯。
坐電車去大船（唸做oofuna），天氣烏陰閣小寡雨霎仔。JR東日本買鎌倉江ノ島PASS，一个人700￥。mono rail對鎌倉坐到江ノ島，佮電車拄好倒反，鐵枝路是佇頂懸，車廂是吊咧，下跤空空會使看著街仔路个車teh走，親像佇遊樂園坐遊園車足心適。
出站敢若無啥物人，一到江ノ島車頭，虎~有夠鬧熱。佇電腦頭前看有夠濟擺，毋閣真正來到遮猶是感覺“哇~這就是江ノ電”。車頭到江ノ島个這條路滿滿个觀光客，當然阮嘛是，閣有足濟足濟真古錐、真有個性个店，逐間攏予人想欲入去踅踅看看咧。那行那食物件散步到江島神社，半路有看著有店teh賣攕規條个瓜仔，一枝60￥，足奇怪个食法。閣有一間江ノ電个專賣店，攏是佮江ノ電有關个產品，逐項攏足古錐。観光案內所个阿桑問阮敢是對台灣來个，可能捌聽過別个台灣來个遊客講台語，佇挑工紮來頓印仔个簿仔頓江ノ島个印仔，就行轉去車頭坐車。
江ノ電上心適个就是腰越這段，電車駛佇街仔路个中央，佮車騎做伙，閣有LED看板提醒電車到位矣，鎌倉高校邊仔个踏切猶是足濟人佇遐等電車過欲翕相，車速無緊硞到鎌倉，買oo-mi-a-geh(土產)个時間。踅去邊仔个御成商店街，禮拜時仔是步行者天国，干焦用行个佮騎跤踏車會使入來，規條街仔攏是足有個性店。轉去到横浜五點四十外分，佮村田さん約六點佇西口，阿母佮小妹去踅街。我捌佇屏東共村田さん上台語課，伊一年差不多有一半个時間攏佇台灣。
暗頓食个是正港个日本料理，頭家有家己个漁船仔。服務小姐講一堆菜名，聽攏無，予村田さん全権處理。一開始是烘細隻魚仔，小跤个烘爐囥佇桌仔頂烘，閣有一項，愛分三改食，開始食上頂懸个菜，過來摻一寡料食第二層，上尾仔共壺湯倒落去攪飯食，成心適个食法，嘛有海胆、蟳仔，閣有足濟項毋知菜名个，這若毋是佮在地人來，真正毋知通點遮个菜，嘛毋知人來這種店。
写真

神国の旅二日目／第二工

今仔日無騎車，坐電車去東京踅街。
日本無早頓店，佇厝裡食無就愛去利便店食早頓。今仔日是踅街个行程，小妹有攢一張shopping list，我嘛有攢一張景點个list。
行路去横浜車頭坐電車，坐到東京車頭，東京駅有佇我个名單內底。東京車頭閣較鬧熱横浜車頭，前幾年才重建好勢。對正門出去，彼个圓形厝頂就足精彩。足濟遊客佇外口廣場翕相。行去對面个KITTE(きって，切手，就是郵票)，這是原底个中央郵便局，這馬改做shopping mall，一樓有一部分保留做郵局，厝樓尾頂會使看規个東京駅佮附近大樓，主要是免銭，暗時仔來一定閣愈媠。
丸の內遮有日本齣个撮影ロケ地，人は見た目が100パーセント，三菱一號美術館，佇彼个窗仔外口翕相个人應該攏是有看彼齣戲。丸の內會使講是東京个Manhattan，雖然我毋捌去過Manhattan。轉去東京車頭地下街食晝，踅幾偌lìn才買一个便當，700￥（差不多180台票），飯有夠少，毋閣成𩚨成好食。地下鉄線路成複雑，入毋著改札口欲出來愛扣一屑仔銭。坐去錦系町，嘛是為著欲去雑貨店（雑貨就是生活用品、文具...）買物件。日本个車頭邊差不多攏有跤踏車駐車場，有地下嘛有人行道邊，騎跤踏車个人足濟，大部分是ママチャリ（ma ma tshia li），看起來是對厝裡騎去車頭囥，才閣坐電車去上班、上課抑是買物件。大路車足濟，毋閣斡入去較小條个路就是住宅區佮各種个店，就變做另外一个世界，行路--个、騎跤踏車--个，速度足慢。路个彼頭就是sky tree，用行--个足久才會到，遠遠看就好。佇lawson買涼--个佮點心食，才閣坐去銀座，為著欲去踅Loft。

出車頭捎無方向揣無銀座个地標，原來是佇頭殼頂，行去對面看較有。差不多上貴个品牌攏有佇遮設點，是講佇地這爾貴个所在會使開賣文具个店，真正有夠厲害。
踅了已經足晏--矣，行去有楽町坐車進前，先去利便店買泡麵欲轉去泡，買了看著一間吉野家就入去食。
写真

神国の旅一日目／第一工

舊年熱人論文个實驗計劃好開始做，到十月收著袂少樣本，毋閣，過來進度就一直牢佇暇。閣有一件代誌，過年去山裡露營，手機仔摔歹去，佮小妹開講講著，挈阮母仔無teh用的手機仔來用就好，修理个錢省起來去日本，順這个勢二月初六機票就共決--落-去，迫家己一定愛佇這學期畢業，當然後手閣經過足濟代誌。
頂回去日本已經是十六年前--矣，自細漢就對日本足有興趣，聽日本歌閣有錄影帶時代个“志村大爆笑”，日本對我來講是一个有夠神奇个所在。差不多三、四年前閣開始看日本齣，會記得是『TOKYOエアポート〜東京空港管制保安部』，日本齣佮日本民族性仝款，劇本頂真情感部分處理足幼路。這改去日本嘛是為著欲揣戲內底个撮影地。所以意思就是，五個月前就開始做功課--矣。
跤踏車前一暝就包好勢，因為阮阿母佮大漢小妹嘛欲去，做伙坐五點半計程車到機場。我个飛機較早就先去報到。頂遍來機場已經成十年前，閣是坐國內線，所以佮第一遍來差不多仝款新鮮。
起飛个時邊仔彼个tshuā囡仔个tsőo人手共椅仔kuainn挽絚絚，看起來足緊張。閣有干焦彼个囡仔就起來放四五改尿，厚尿閣欲坐窗仔位。
兩擺來日本拄好降無仝機場，成田機場有夠大，愛行足遠个路。日本入境愛翕相，閣有掃兩枝指指个指模。去JR東日本買車票，接待佮櫃台小姐英語攏袂䆀，票挈咧綴人行出去，干若毋著，問一个oo-jí-sán才知是頭拄仔買票个對面。Narita Express(略N'ex)成田到東京／横浜來回干焦4000￥，等於一逝才五百捅箍台票，車頂有wifi閣會使充電，嘛有專門囥行李个所在，遮--个對我來講攏足需要，一點48个車，駛無偌久就開始落大雨，出千葉縣雨就停--矣。到隅田川進前就會使看著sky tree(華語翻做晴空塔足奇怪)，第一擺親目睭看著足新奇--个。佇東京車頭頭前節佮後壁節分開，繼續駛去横浜。

一出橫浜个改札，hóo~有夠濟人，佇外口共跤踏車輦仔灌風(上飛機愛漏風無會piāng去)，牽過陸橋過高速道路个另外一爿，往"港未來"(みなとみらい)去，紲落來欲佇遐十二工。
佮拄來日本个台灣遊客仝款，第一件注意著个代誌就是，路夭壽平！先騎去港口、市內踅踅咧，五點外才轉去細漢小妹遐，頭擺看著查某孫仔。暗頓等阮阿母佮小妹到位才佇車頭地下街食。
写真
access: 屏東

 

佇日本騎跤踏車Cycling in Japan

研究所畢業矣，來去日本畢業旅行，紥跤踏車去騎。

坐LCC航空欲另外紥行李愛閣加錢，我个跤踏車差不多十捅公斤，所以另外買15公斤，來回1500-台票。我無用紙箱抑是𠕆kheh仔，就是普通个車袋仔，較好收。

報到个時櫃台會問內底是啥，會佇袋仔tah一張“Fragile”个貼紙，閣一張說明予我簽名，意思是講因為無妥當个包裝，有可能會佇運送个過程中kho傷啥物貨。上好愛有帶仔通揹，行李領了到外口抑是坐其他交通工具閣有一段路愛行。

大概整理一寡重點：

（1）東京抑是横浜市內个路攏有跤踏車道，毋閣國道無（日本个國道會使騎跤踏車），愛騎佇上外口（倒手爿）。

（2）日本个青紅燈第一段是直行佮倒斡，若欲正斡愛等到第二段佮車做伙。我是先直騎到對面，等彼爿青燈才閣行，佮咱遮"待轉"差不多。

（3）日本个車路攏一定有人行道（高架道路當然無），啥物所在行路攏會到，跤踏車會使騎上人行道，毋閣愛讓行路个人。照規定跤踏車佇人行道騎嘛愛照車个方向，毋閣我嘛學日本人貪方便騎正手爿，因為有个路真正有夠闊，欲騎過彼爿愛等足久。

（4）我个活動範圍東京佮横浜附近，攏是市區，台灣騎跤踏車个經驗無法度套用佇遮，像横浜到鎌倉25公里，我就騎超過兩點鐘，因為市區佮市區攏相連，騎一點鐘閣猶袂出横浜市，規路攏teh等青紅燈，凡勢超過一百个以上。横浜到東京閣愈嚴重，路足平車嘛攏守規矩，毋閣速度就是緊袂起來，所以到尾仔我就用車袋仔包起來，坐火車到品川才閣開始騎。

（5）除了高架个高速公路佮有特別規定个地下道（標示攏蓋清楚），其他攏會使騎跤踏車。拜六禮拜有个路段實施"步行者天国"，像銀座、秋葉原，連跤踏車嘛袂當騎，愛落來用牽--个。
(6)跤踏車愛包才會當坐電車，直接過改札口行到月台，遮个電車是teh講一个城市到另外一个城市彼種，若是地下鐵人攏足濟，紮跤踏車去車頂可能會造成別人个困擾

多語台灣

 坐佇台東兒童故事館樹仔頂个籠仔內，聽著這个阿妹仔走uì我邊仔過teh叫“阿兄~阿兄~”(用台語)，共應“阿恁阿兄佇佗位？”，伊就停落來peh入來我這个“籠仔”內佮我開講，就問我講“你嘛講台語喔？”、“阿恁媽媽佇佗位？”，“佇厝啊”我應...，“啥人tshuā恁來”，“爸爸”，“阿恁uì佗位來“,"對面",我應"遐--喔？"（指彼爿），“毋是啦”（指另外一爿），尾仔怹阿兄對隔壁走出來，我就講"阿你攏無出聲你妹仔teh揣--你 "，了後怹兩个就tong、 tong、 tong 走落去--矣。

這對兄妹仔台語講著真輾轉，老父教育有成功，一聽就知影怹佮厝內人个慣用語是台語，毋過佮別个囡仔講話就隨轉過北京語，語碼轉換(code-switching)誠緊，攏無重耽、無閬縫。