台語新詞 【電筆】

【tiān-pit電筆】

用iPad上課ê時，攑電筆teh點，三、兩下了後，e̋~ khái無反應，hit pha電源指示電火hua去--ah，就隨講"無水--ah"，坐頭前排ê查某學生本來細細聲笑，愈笑愈大聲，差一點仔笑反kuè，“ah~是無電--ah”隨反口供，koh家己笑笑仔“ha！講慣勢去--ah”...

【狗仔癀】

 

狗仔瀾有癀

半爿手蹄仔腫kah若麵腸仔

一空一空ê牙痕

是你來過這个世間ê証明

【屏東點心】

新庄仔媽祖廟口豆花（新圍慈天宮）

這擔豆花特別ê所在是怹ê糖毋是糖膏，是碎冰，熱人來食上蓋讚，koh有摻綠豆仔、紅豆仔，食起來袂傷甜，毋閣我khah愛食足甜--ê -ah -ah -ah。

這間新庄仔媽祖廟，足久足久以前，可能一、二十年前，我有夢著，袂記是坐啥mi̍h人ê車，阮已經過身去ê阿公坐我倒手爿，車拄好停廟前，我斡頭過去就看著這間媽祖廟，應該是暗時仔，因為我會記得廟五花十色ê燈仔火，hit時我才知影我ê夢是彩色--ê，聽講會做彩色夢ê人頭殼較巧。

微羅港新娘

古早古早，日本時代ê故事。微羅就是現此時ê彌陀。
有一个tsőo囡仔，足愛食雞頷頸，老母疼囝，定定iap予伊食。伊嫁去微羅港，入門ê隔轉工透早，佇灶跤teh剁雞肉，紲手就共一塊雞頷頸that入喙，就佇仝這个時陣ê仝這个時間，雄雄聽著後壁ê跤步聲來到灶跤門口，是怹大家，tshuah一tiô喘一下大氣，一塊雞頷頸猶未哺就吞吞luè，哽著嚨喉，一下仔就死死昏昏去。
佇日本時代，普通人若過身去是無teh打桶囥過暝 ，閣再這个新娘娶來頭一工就過身去歹吉兆，會帶衰翁婿這爿，當日就扛去埋。
較早定定聽講有彼號偷挖墓--ê，怹攏有法度知影佗位有、啥物款墓有好空通好thio。消息遐爾仔通光，hit暝兩个偷挖墓--ê就來到暗bong-bong無半个人e墓仔埔，紮著機司揣到這个新娘ê墓前，怹想講這新娘拄嫁來，定著佮袂少嫁妝按呢。
新墓塗無蓋tsa̍t，無一下仔久就著棺木，驚仔hông做譴sńg，共偃起來，前三後四lua̍h-lua̍h咧，就佇仝這个時陣ê仝這个時間，哽佇嚨喉ê彼塊雞頷頸煞落落luè，喘一个大氣了後就精神起來，這兩个偷挖墓--ê驚一下險仔滲尿，起跤lōng，哀爸叫母，走kah phùn框。好哉在拄埋luè無幾點鐘，棺木嘛無打桶，嘛哉在有內底彼sut 仔空氣。

猶未完全回復元氣ê這个新娘，用盡上尾ê氣力，足無簡單行轉去到厝--lìn。這个時陣怹翁婿拄peh起去眠床頂欲睏，叫是看著怹某e鬼魂轉來，驚kah規身軀tsiâu起雞母皮，喙--lìn一直踅踅唸：阿彌陀佛--ooh，你欲去就做你去，毋好閣轉來揣我--lah，你若有欠用啥我才閣燒予你--lah...。
這个新娘講：無啦，我無死啦，怹翁講：我毋信，阿無你共手伸入來予我摸看覓--leh，ai-iō閣有影燒燒，才放心開門予怹某入來。
後來，人若講著足sâi食ê查某人，就共khau洗講：阿你這微羅港新娘啦！

【屏東人ê早頓】

屏東涼麵攏是甜--ê，而且是當做早頓teh食。有摻糖粉kah塗豆麩，大部分有瓜仔薟，有ê較工夫--ê閣有豆菜。

mih-sooh湯是sa-bì-suh --ê，會記得第一碗愛食原味--ê，這間有芳芫荽，愛食偌濟家已khat。

麵ê搵料愛留下毋好討債㧒捔，共濫落去第二碗湯內底，就會使食著完全無仝款ê滋味。

ママチャリ東京mamachari--第２工20180801

Tsőo人車踅東京

這擺攏無計畫行程，儘量去毋捌去過ê所在，干焦想上尾兩工閣去横浜，第九工透早就上飛行機矣，等於佇東京睏六暝。

透早起床那看新聞那想今仔欲去佗位，款好共物件鎖佇櫥仔內，干焦揹一跤小跤揹仔出門，嘛免揹囥車籃仔內就好。

來去柴又（shibamata），路線無規劃，干焦知影方向，感覺無蓋確定ê時才閣開地圖來看。向東行會迒過幾若條溪，uê會過兩擺，因為溪仔是彎--。騎過隅田川橋，對浅草出來向東代先拄著隅田川（sumidagawa），岸邊有足濟人teh運動，日本齣嘛定會來遮出外景。Sky Tree真正有夠懸，已經騎足遠--矣嘛攏猶閣有看著。

橋雙爿邊攏有人行道，騎佇頂面會使寬寬仔騎兼看風景。 過荒川就是葛飾，葛飾這方面uê是較舊ê市区，閣有大正、昭和ê氣氛。停毋知幾个青紅燈，過中川佮新中川頂面ê橋，無偌久接著柴又街道，斡倒手爿向北一直騎，先去柴又帝釋天（神社），車仔鎖佇遮，入去参拜閣抽一支籤，神社頭前ê参道嘛是老街，用行--ê去車頭看寅さんê像，毋閣這齣戲我完全無印象。中晝頓去Lawson買一个便當轉去車頭揣椅仔坐teh食。行回頭看著一間專門teh買tshit迌物仔ê店，店內攏是古早味ê物件，食--ê、耍--ê規厝間滿滿是，原來是一間tshit迌物仔博物館（柴又のおもちゃ博物館）。
Uì神社邊踅過，踅過“寅さん記念館”去後壁ê柴又公園休中晝，公園是起佇護岸頂，有電梯通坐落去記念館。
休睏煞順護岸邊ê路落去，順神社邊ê路騎，欲去亀有揣烏龍派出所，雖然我無teh看hit齣 bang-gah。佇高砂八丁目斡正手爿一直騎，過中川橋就是亀有，揣無會使停車ê所在，看著一間銀行外口有堆跤踏車，就揣一个縫插入去。車頭附近有tshāi幾偌仙両さん佮其他人物ê像，真正有進入bang-gah內ê fu，毋過hit間派出所毋是烏龍派出所。

過來想無閣會使去佗位，騎“曳舟川親水公園綠道”回頭，遮可能古早時是一條溪仔ê款。雙爿邊ê厝離足遠，四、五十米有，一爿是車路、一爿是三、四公里長ê親水公園，有水池仔、有噴水池，停車（跤踏車）蓋利便，有便所閣有沖水洗身軀ê所在，足濟家長tshuā囡仔來耍水，囡仔teh耍水家長佇邊仔開講。
軁過高架快速道路下跤，騎佇新四ツ木橋頂過荒川，懸懸ê sky tree就佇頭前。轉去到隅田川浅草附近才四點外，共車鎖--leh，用行--ê落去岸邊散步。
下暗身軀洗好騎出去揣十間橋，是看sky tree夜景上好ê所在，愛共sky tree佮十間川ê倒影做伙翕起來，這嘛是日本齣“正義のセ”ê撮影地，下暗足濟人佇附近散步，sky  tree ê夜景配bi-luh有夠讚。
写真

ママチャリ東京mamachari--第一工20180731

舊年去日本耍了無夠癮，今年閣來去，毋過機票一直拖到三月才訂，高雄起飛攏足貴， 揣桃園起飛个，俗高雄差不多3千，kah舊年比起來嘛是有較貴一sut仔。
阿機票欲按怎訂？佗一工？攏總幾工？足簡單，ah都看佗一工去程上俗、佗一工回程上俗訂落去就著--ah。
前一暝拄對澎湖划船轉來，拜一下晡揹一包行李，用行个去舊phu-luh騎PBike，去車頭坐統聯， 台中休睏一擺，佇中壢落車，坐轉去機場个車。有紮物件來食，佇機場利便店買涼个佮點心，頂遍來桃園機場坐飛機已經是欲20年前，坐去LA彼改。想欲揣所在睏 ，毋過會使倒个所在攏總有人，揣著一liau便所邊个椅仔，the咧休睏。2點55个飛機，猶未一點就去排隊，已經有足濟人teh等矣。
坐到成田是日本時間七點外，佇利便店買sandwich食。無欲直接去東京，來去銚子（唸做tshiò-sih)坐火車，嘛是佇日本齣（宮本から君へ）內底看著个景點。
機場坐去成田閣轉車，外口足熱佇待合室內底吹冷氣，就愛等有人起來才有椅仔通坐。到銚子先出站去外口街仔路lau lau咧才閣轉來買車票，毋過車頭人講先入去等下佇車頂買就會使。月台彼爿有一間足古錐銚子電鉄用--ê車頭。
足古錐干焦兩節火車，佇車頂共生做小細小細古錐錐查某車長買一日卷，先坐到上尾站外川，就是出現佇日本齣內底hit个木做火車頭，出站順巷仔行到漁港斡倒手爿，到底就是長崎鼻，日語佮台語相像，嘛是共捅出去海裡个陸地叫做鼻。轉去外川車頭一班車拄走，愛等成點鐘才閣有車班。
一个oo-ba-sang入來，先佮車頭店員開講，來坐佇我个邊仔，共我ai-sa-tsu，佮伊烏白喋開講規點鐘，一直到車來。
坐到後一站犬吠落車，行去燈塔遐，去鼻太平洋个海味。閣佇觀音站拄著彼个oo-ba-sang，佇車頭內底挈一枝葵扇予我，講這會使挈，是千葉県観光局做个歓迎人客来千葉。一日卷佇遮會使換一个お守り，行去圓福寺，揣著人問，講是愛問行較落去佇彼爿个飯沼觀音。行轉來車頭个半路，有一陣差不多國校四、五年个囡仔，可能相招好欲拍球，停跤踏車个時我拄好經過，其中一个佮我四目相相，無斡頭無閃避，足有禮貌共我ai-sa-tsu "こんにちは"，我嘛共應“こんにちは”。
閣拄著彼个oo-ba-sang，菸食足大，毋知是攏一直佇車頭內底，抑是已經去外口踅一睏轉來矣，佇遮共伊講”さようなら"，直接坐轉去銚子。
坐有夠久才到上野，欲去新御徒町自転車駐車場租跤踏車。是一个oo-ji-sang管 ，tu一張申請表予我寫，欲佇東京一禮拜，選租7工1200￥，倩彩揀一台，是懸手扜仔个tsőo人車。騎去浅草進前訂好个旅館，是khia-phu-se-luh一个人一格，佇櫃台check-in，頭家袂曉念我个羅馬字名，看護照才講oo~朱さん，領一su睏衫、一包齒抿喙鬚剾仔。身軀洗好騎出去踅踅咧，閣去超市買便當食。
写真

【屏東ê記智】

佇屏東公園軟式THIAN-NÍ-SUH KHÒO-TOOH 佮攄冰場（這馬改做停車場）ê中央，這馬是老人會歌唱俱樂部，50幾年前有一个像排球場ê表演場，差不多是圓形个，有觀眾看台，毋過無厝頂。一年會有一、兩擺日本來个SA-KÀ-SUH(馬戲團)來遮表演，彼个時陣就會有宣傳車teh四界放送：“SA-KÀ-SUH來矣、SA-KÀ-SUH來矣”
彼陣囡仔想欲看無錢通thiah票，就會去掠貓仔來換票，阿he貓仔是欲予虎食--ê.

酒精爐架DIY

想欲用較早買ê酒精爐佇露營ê來燃，愛輕、好收， 鼎仔khuè（架）起去愛在，參考網路做tshuài

材料：歹去ê跤踏車輦仔ê鋼絲、原子筆ê弓仔

專業台語--thóo-lí-tshú-kheh

暗時十一點外个跤踏車行，一个查某人客坐起去椅墊仔頂拄欲騎走。
“遮暗閣有人客喔？＂我講
頭家：“來鬥電火，都來矣，嘛是愛共服務啊~＂
“阿彼毋是買轉去家己鬥就好矣？＂
“愛共伊鬥彼个thóo-lí-tshú-kheh＂
頭家茶沖好對內底出來
“直接講thóo-lí-tshú-kheh喔？＂
“無講thóo-lí-tshú-kheh阿無欲按怎講？＂
外奶→thài-iah
手扜仔→ha̋n-tóo-luh
來源：日本語
thóo-lí-tshú-kheh：取り付け
thài-iah：タイヤ
ha̋n-tóo-luh：ハンドル

神国の旅十一日目／第十一工

上尾仔一工會使出去𨑨迌，明仔載就欲上飛機--矣，佇名單頂面想欲去个所在差不多攏去了--矣，小妹建議个所在有較遠一屑仔，後擺有機會才閣去，想著神田，今仔莫騎車仔坐電車去遐散步。
神田是東京个後一站，這條線(京浜東北線)已經坐幾偌擺--矣。神田駅个站體是高架鐵枝路，空間利用真幼路，規排个紅磚仔壁嘛足有気氛。向西一直行，倚中晝--矣，足済穿白siah-tsuh佮烏褲抑是烏裙个上班族出來食飯，有个店看起來足厲害，毋過排有夠長就放棄。神田駅到神保町个巷仔內足済賣食--个、啉--个佮點心店，攏是欲賣予這附近个上班族。一直行到神保町，遮有足済冊店，新舊攏有，入去冊店踅，有袂少上班族利用中晝休睏時間出來踅冊店看冊。遮嘛有すすらん(susuran)通り，佇一間餐廳外口連接無料wifi上網路一下仔。看著一間賣中古CD个店，一樓是古典、二樓是其他--个，物件真正有夠済，連80年代我開始買CD彼陣--个嘛足済，抑是後擺才閣來款貨，行李楔袂落去--矣。佇桵通り這个路口正斡向北行，經過水道橋駅，過橋到神田川个北岸，遮有足済間學校，順天堂大学、齒科大学攏佇遮，佇お茶の水橋斡正手爿，橋頭有一塊お茶の水个石碑，向お茶の水駅行過去，經過一間冊店，共CD排佇外口亭仔跤teh賣，有演歌閣有我讀國中个時當tshǹg个松田聖子佮中森明菜个CD，閣較過有一擔teh買敢若手巾仔抑是頭巾，買三條佮意个花草，過お茶の水駅西口斡正手爿。佇路裡行我攏會注意跤踏車，日本个路辺連跤踏車嘛袂使烏白停，有劃特別个区域通停，抑無就愛停去停車場。遠遠就有看見圓圓个厝頂，彼个是"東京復活大聖堂"，是重要文化財，peh起去辺仔个"紅梅坂"，倒斡就小寡落崎。可能遮个地名較早叫做駿河，有看著足済有"駿河"个看板，佇一間神社外口看著一張單仔，公告逐工透早个"ラジオ体操会"个時間，就是收音機體操會，誠心適。進前捌看過報導，國校个囡仔歇熱个時愛參加社区个la-jí-ooh體操會。遮个仔路凊彩一條攏足媠，細條巷仔內嘛有足済古錐个咖啡店。

佇路裡行熱一晡--矣，覓入去FamiMart吹一仔冷氣，順紲接用wifi，佮厝裡Line，講踅kah已經毋知影欲去佗位--矣，小妹建議會使去上野，用到wifi个時間到切斷閣上路，順本郷通り向北一直行去，行昌平橋閣迒過神田川，猶閣到昨方才來過个秋葉原，行內底較小條个路，遮有足済賣電腦、電子零件个店。佇路口等紅燈先入去薬妝店踅踅咧，過大路中央通り就是足有名个アメ(a-me)横商店街，遮是愛siá-phinh个人个天堂，食--个、穿--个、用--个逐項有，名牌鞋運動鞋囤規堆teh賣，観光客大部分攏大包細包，尤其是阿六仔有夠gâu買。行去對面个上野恩賜公園，順噴水池辺仔彼條路行，這个公園有夠闊，毋閣這改干焦經過爾無欲踅，欲去彼爿个谷中。順神社辺仔小路仔行出去，水月Hotel是文豪森鷗外蹛過个所在，做醫官个時有來蹛過台湾，行到谷中，遮是下町，就是舊街仔，足済足舊个老店，有一間賣薁蕘个80年个老店(1934)，店名叫"愛玉子"，片仮名寫做"オーギョーチイ"唸起來是台語音，薁蕘子嘛是台灣產--个。這箍lê有夠済墓仔埔，夾佇街裡个住宅、商店中央，日本人敢若無彼種禁忌。斡入去"初音小路"，有夠古錐个名，厝嘛起了足古錐。出初音小路路口正斡是日暮里駅，倒斡小寡落崎接一段樓梯去谷中銀座，這就是有名个谷中"夕焼けだんだん"，谷中銀座誠鬧熱，有電頭毛店、衫褲店、雑貨店、時計店，嘛有賣魚仔賣肉賣菜个店，聽(thíng)好踅規晡攏袂siān。看著一間薬妝店，入去揣厝裡个人寄買个薬仔，有一罐揣無，用手機仔予店員看共問佇敢有這罐，伊才挈予我。天愈來愈暗，行到日暮里駅，上崎个樓梯會使看夕焼(日頭落山)个sky tree，直接uì遮坐轉去横浜。
写真

屏東焦麵地圖

屏東干焦有焦麵、無麻醬麵！
佇屏東个麵攤(店)叫焦麵，內底一定有麻醬，有个人驚大箍無愛麻醬愛先共頭家講，若無講一定會有麻醬，有个頭家會先問敢欲麻醬。整理一寡我捌食過袂䆀个麵店，重點是焦麵順紲涼麵，因為我驚燒，袂愛食湯--个，食麵嘛袂愛配菜。
1.伍媽媽麵店：佇海豐海國校對面，焦麵有夠大碗，靠體力做工課个人上愛這
2.王家涼麵：大35、細30，在地人當做早頓，賣到下晡一點爾，頭家蓋阿灑哩麻醬𣁳足済，mí-sooh湯啉免驚
3.易奎擔擔麵：佇屏東都城隍廟對面，肉臊誠特別，麻醬誠芳，麵个份量袂少

神国の旅十二日目／第十二工

今仔是佇日本上尾仔一工，十二工个旅行到今仔欲結束--矣。透早愛去車頭坐車，五點外就起床，tsò日買个sio̍k-pháng𩛩果醬食予了，配昨方買--个彼罐banana latte(弓蕉豆奶)，本底是想講倒一杯偆--个留佇冰箱予小妹怹，毋過一啉，俺娘喂~有夠歹啉，現灌兩杯，偆--个倒佇茶壺內底紮去車頂抑是機場配pháng。行李是昨暝就款好--矣，欲出門个時小妹怹嘛起床，跤踏車拎落樓跤，騎第一工來仝款个路去車頭，佇第一工來个時仝款个所在共車仔包予好，行入去車頭，今仔是拜二，七點外个月台頂已經有足済人teh等車，等一下仔我欲坐--个N'ex來--矣，共車仔囥佇行李架仔頂，去揣我个位坐，放送一直提醒人客，號碼鎖个號碼若袂記得，就愛到上尾仔一站才會當開。八點半就到成田空港，佇第二terminal落車，先去報到，揣足久閣去問--人才揣著報到个櫃台，輪著我个時，小姐問我敢會使坐緊急出口彼位，好--矣無差。時間猶早閣去樓頂免稅店踅踅咧才去安検，阮个飛機是佇98號門，行有夠遠自頭行到尾才到位，有延(tshiân)一下仔才開始登機，這改我是坐窗仔辺，會使看風景，手機仔收會著GPS信號，佇地圖頂會使顯示將時个位置。這兩工仔台灣拄好有風颱過，到高雄當teh落雨，拄好小弟佇小港，坐伊个車轉去。