五十箍

阿英仔是瑞祥里的里長娘--仔，咧開葬儀社，嘛有兼做土公仔，欲入去火葬場彼條路規排販厝攏伊買去。阿英仔做人A-SÁ-LIH大細漢通人知，毋過伊上蓋驚怹翁，定定予怹翁揍（bok），朋友苦勸伊離開怹翁，毋過代誌過了後嘛是乖乖仔轉去。這兩年仔阿英仔過身去，逐家煞攏替伊歡喜，講伊解脫矣。

阿英仔的好胆嘛有影出名。屏東若有彼種車禍挵kah碎糊糊的，攏會央阿英仔來處理。阿英仔連手橐仔嘛無掛，一塊一塊共抾入去烏色的KA-LÁ-SUH橐仔內底，自頭到尾目頭攏無結一下，喙裡閣踅踅唸毋知咧唸啥？有可能是共亡者超渡。了後共槖仔提予警方，規陣佇邊仔好玄的"觀眾"攏看kah惦tsu-tsu，連吞喙涎的聲攏有聽見，袂輸咧看一場練習過幾千改的表演，手路幼秀完全無躊躇、無拖沙。

一工，阿英仔tshuā怹囝來我的跤踏車店裡。

「蘇董仔！」阿英仔一入來就共我A̋I-SÁ-TSUH，閣喊(hiàm)怹囝。「志仔，愛佗一台家己去揀。」

「遐坐啦！」我嘛共"案內"(ÀN-NĀI)。「啉茶！」

過一下仔，怹囝走倚來，「阿母！我欲彼台。」

「好！阿偌濟錢？」阿英仔問。

「千五，算妳一千三仔五就好，我下晡才共妳載過去啦！」

阿英仔對槖袋仔撏錢出來：「遮千三，賰仔五十箍你下晡來才閣予你，歹勢！」閣提一張紙寫怹兜的住所。

看著彼張紙頂懸的住所，我的心肝頭tshia̍k一下，阿這干若是彼號...

下晡睏醒，佮阮囝兩个人，載彼台跤踏車，揣對紙條仔頂的住所去。過歸來無偌久就差不多到矣，車停路邊，共車仔拎落來。看著阮囝愣佇遐、喙開開無講半句話，順伊的視線看過去，俺娘喂~對跤尾一直冷到頭殻頂，佇牆圍仔邊的塗跤，tshu一塊大塊帆布，頂懸排烏烏一仙一仙的"彼種的"，袂輸佇曝魚仔乾，上蓋無有二十具。車仔囥落去，共阮囝搝上車，油門催盡磅，路裡，毋知敢是神經感覺，車頂猶少寡鼻去"彼種的"的味。

201407寫佇屏東，朱志煒

潮州燒冷冰的故事

潮州燒冷冰的故事

潮州國小六年三班提供
朱志煒改編

燒冷冰這種物件是按怎來的？故事是按呢，古早古早佇圓環仔附近有一个阿婆仔咧賣圓仔湯，逐工下晡，伊攏對厝裡共攤仔捒來到圓環仔。
因為圓仔湯是燒的，寒人的時人客較愛食燒的，生理蓋好，一下仔就賣了了；毋過到熱人，有時到天暗嘛賣猶袂了。
七月的一个下晡，日頭像火爐，打馬膠路予烘一下軟膏膏袂輸會㽎，街仔路無啥物人，阿婆一手挈葵笠仔擛風，那用手䘼擦汗。無偌久的時間，透大風，烏天暗地，phê-é一下大雨到位。
毋過雨聲佮普通時仔無仝，像咧掖豆仔仝款，tia̍k、tia̍k、tia̍k...，落佇桶仔底閣有咚、咚、咚的聲，這毋是雨，是落雹！阿婆仔連攤仔嘛袂赴收，hám　khia̍t去亭仔跤覓。
無偌久，日頭出來，烏雲嘛散了了，這个時拵，阿婆仔發見講，伊的圓仔湯內底一層厚厚的袂輸若剉冰，拄才浮好的圓仔，ù著冰，一粒仔一粒圓滾滾，照著日頭逐粒金爍爍。
阿婆仔想講今這無法度閣賣矣，毋過倒㧒捔閣拍損，khat一粒仔來食，喔~圓仔皮夭壽khiū，咬落到地，甜甜燒燒的餡流出來，閣咧竄煙，有夠著味。賰个圓仔捾轉去請別人食，無一个食著的人無呵咾--著。
阿婆仔心內嚓一下，想著一步，熱人無人欲食燒燙燙的圓仔，像今仔按呢，濫佇剉冰內底，一定蓋濟人愛食，自按呢，逐个相爭欲來圓環仔食阿婆仔濫燒圓仔的剉冰，燒冷冰的名聲愈湠愈遠。