多語台灣

 坐佇台東兒童故事館樹仔頂个籠仔內，聽著這个阿妹仔走uì我邊仔過teh叫“阿兄~阿兄~”(用台語)，共應“阿恁阿兄佇佗位？”，伊就停落來peh入來我這个“籠仔”內佮我開講，就問我講“你嘛講台語喔？”、“阿恁媽媽佇佗位？”，“佇厝啊”我應...，“啥人tshuā恁來”，“爸爸”，“阿恁uì佗位來“,"對面",我應"遐--喔？"（指彼爿），“毋是啦”（指另外一爿），尾仔怹阿兄對隔壁走出來，我就講"阿你攏無出聲你妹仔teh揣--你 "，了後怹兩个就tong、 tong、 tong 走落去--矣。

這對兄妹仔台語講著真輾轉，老父教育有成功，一聽就知影怹佮厝內人个慣用語是台語，毋過佮別个囡仔講話就隨轉過北京語，語碼轉換(code-switching)誠緊，攏無重耽、無閬縫。