今仔日騎去東京，來去看東京塔(Tokyo Tower)。往北過みなとみらい橋，倒斡過國道1號閣軁過鐵枝路跤走1號國道(第二京浜)上北。日本个國道會使騎兩輦車(跤踏車佮oo-tóo-bái)，毋過無畫慢車道愛儘量騎較外口。路裡不時會看著oo-tóo-bái，當然無台灣遐爾濟，跤踏車大部分攏是ママチャリ(ma-ma tshiá-lih)，就是佇厝附近騎--个，嘛有拄著幾个仔是騎遠途--个。
東京都佮横浜市市区是連做伙--个，規路紅燈有夠濟，行--个停--个速度攏緊袂起來，過五反田小寡正斡，佇慶應大学停紅燈，斡過了紅色--个東京塔就出現佇路个彼頭。對停車場邊仔个小路仔入去，雖然才看過sky tree，嘛是感覺東京塔有夠懸--个，共車鎖佇公園邊，落去公園內，佇水道頭承水來啉，閣共茶壺貯予滇，有夠利便水道水會使直接啉，佇椅仔休一下仔才閣起行，閣佇塔下跤補翕幾偌張相。想欲去渋谷，東京塔佇港区，愛向西騎去渋谷，騎過麻布十番（あざぶじゅうばん），遮是高級住宅区，地形是起起落落个小山崙，peh起去牛坂，閣斡過去接大路(六本木通り)，一直騎到渋谷个路口，共跤踏車鎖欄杆，入去踅冊店（山下），尾仔轉來以後看新垣結衣演--个Smile主角佇這間冊店相拄，佇天橋頂識悉。遮个路攏有畫跤踏車道，騎過大路去八公銅相彼个路口，這應該是全世界上鬧熱个路口，八公个銅相仝款有夠濟人teh翕相，其實八公个故事牽牽咧佮屏東嘛有關係。想欲去Loft行毋著方向，看地圖才知，共車仔鎖佇後壁巷仔內，對一樓入去，買一枝万年筆佮一台免釘仔个釘冊機，開1600箍￥，買了就走無閣踅落去。車仔牽--咧用行--矣佇附近踅踅--咧，行109邊仔彼條路，peh崎起去，接去大路玉川通り(六本木通り過渋谷名變做玉川通り)。向西騎到世日谷个三軒茶屋，去坐東京个兩條路面鐵枝路个其中一條，世田谷線。先看著すずらん通り，共騎入去，遮嘛是日本齣東京女子図鑑第二話个撮影地，踅透透揣無所在通停車，路邊攏有停規排跤踏車，毋過嘛有告示講袂使停會拖走，踅一下仔共車仔鎖佇細條巷仔邊仔个電火柱，用行个去坐車。車頭个人看我相來相去過來問我，講欲買"世田谷散策きっぷ(散步車票)"，大人一張330￥，嘛是一節足古錐个車廂，佮荒川線个車廂比起來較有科技感，若林駅進前个踏切無遮断機，電車愛照青紅燈，青燈才會當行，遮嘛是一个景點，誠心適。坐到松陰神社前駅落車，佇附近行行踅踅--咧，規个社区足清氣siùnn，路無蓋闊毋過足平，人--攏用行--个較濟，有个騎跤踏車，無khuàinn騎oo-tóo-bái--个，嘛足少看著超過兩樓个厝，應該是社区活動中心个款，嘛整理kah像咖啡厅，閣有印kah足媠、紹介足詳細个社区散策buh-kuh。
坐到終點站，行出外口佇鐵枝路邊等翕電車出站，我頭拄仔坐个彼台車原車回頭載客，落車佮上車uì無仝爿个門。閣轉去車頭坐車，佇松原落車，鐵枝路邊是Next Girl Meets Tokyo(第二話，フジテレビ)个撮影地，逐集無仝个女主角，無仝个所在做舞台。逐站攏袂少人上車落車，表示這條路線猶閣有足濟人teh使用。直接坐到頭一站落車，入去車頭這棟大樓个上頂懸層26階，是室內个展望台，無料，會使看規个世田谷区，邊仔是咖啡厅，會使點一杯咖啡那啉那看風景，這棟大樓叫做Carrot Tower，紅菜頭大樓，足古錐个名，因為外壁个thài-luh个色水，當地个高校生共號名--个，有收佇東京デートナビ(東京約會案內)夜景類內底。欲牽車个時拵閣揣一下仔，細條巷仔斡來斡去足複雑，轉去閣愛三十外khí-looh个路愛騎，轉去玉川通り接318環七通り，半路看著龍雲寺花園盆踊り大会个會場，足濟攤仔來排中央舞台搭好--矣，毋過彼是下暗个活動，接1號国道落南，愛先軁過1號下跤過彼爿，才閣peh交流道上1號国道，騎跤踏車peh交流道有夠趣味个經験。
写真
今仔日落雨，無法度騎車，坐電車出去。行猶袂到車頭鞋仔就澹去--矣。
先坐到五反田(ごたんだ；go-thang-tah)，這个車頭誠心適，欲轉都營个地下鉄愛先行入去邊仔个百貨公司个四樓，落去二樓接外口个天橋，才閣落去塗跤个入口。這當然愛先做好功課，因為出門了後就無網路通用，我个手機仔內底閣有先安裝離線嘛會使用个地圖(Maps.me)，牛哥地圖日本地区無通仔下載離線个用，嘛有東京地区電車佮地下鉄的路線圖。
佇五反田駅買1 Day Pass，一張700￥一工內都营个地下鉄電、Ba-suh、荒川線佮日暮里・舎人ライナー在你坐，感覺誠利便閣無貴合台票差不多才百七箍。坐到浅草駅落車，行去浅草寺，大門當teh整修，仝款有夠濟観光客，進前有來過就無入去--矣，主要是欲來看隈研吾設計个浅草文化観光センター，上頂懸層是免銭个展望台(嘛有免銭个wifi)，會使看sky tree，毋閣因為天気無好，攏予雲遮--著，拄著台灣來个鄉親，講南部腔个台語。紲落來行轉去浅草駅坐去藏前，出站行一段路斡過一个路口到仝款藏前駅毋過是大江戶線，坐到若松河田落車，雨落愈大，攑雨傘用行--个感覺嘛袂䆀，遮个地勢毋是攏平--个，落崎peh崎个崎日文叫做坂(さか，sa-khah)，行入去早稲田大学內底，名校个気氛就是無仝款。經過一个敢若是餐廳个所在，想欲入去食飯感受一下仔佇名校食飯有啥無仝，飯看會較芳較好食無?結果彼是像活動中心，有一排一排个桌仔，有利便店teh賣涼个佮點心。出早稲田大学無偌遠就到都電荒川線早稲田駅，一下仔車就來--矣，雖然佇電腦頂已經看足濟擺，毋過現場看嘛是感覺，hóo~有較古錐，共車票予車長看一下就會使上車，毋免過彼个機器。車廂干焦一節爾，有袂少人teh坐，本底欲拆㧒kak个這條路線，好佳哉是在地人个堅持，才有法度保留落，台灣本底嘛有足濟這種市內个路面鐵枝路，攏拆了了--矣，有夠無彩，無嘛毋免走這遠來坐。原底是暗算逐站落車佇附近行行踅踅咧，毋過可能會坐到天暗嘛坐袂到上尾站落車，其實逐站應該攏足好耍，無要緊，後擺猶閣有機會。
坐到"鬼子母神前"落車，鬼子母神是保庇有身个婦人人和囡仔个神，相關个故事會使上網路google。看著遐有通頓印仔，我有攢一本簿仔通頓印仔，到今仔已經頓袂少个--矣。閣坐一站佇雑司ヶ谷落車，遮有佇我个list內底，來參觀墓仔埔"雑司ヶ谷霊園"，其實是欲去看夏目潄石个墓，這內底有袂少有名人个墓，附近个東池袋、鴨巢攏誠好𨑨迌。到大塜駅前斡一个大斡，古錐个電車寬寬仔駛佇路裡佮路裡个車行做伙，真正有夠心適，我無落車直接坐到飛鳥山，遮會使看電車等紅燈。落車隨衝去天橋頂等，開錄影模式共這个心適个情景錄起來。行過公園彼爿，坐單軌"電車"(飛鳥山公園モノレール)去山頂，其實干焦48米，peh17米懸，兩分鐘就到位--矣，遮會使看著荒川線單節个電車佮路裡个車駛做伙踅過飛鳥山。閣上車，坐佇電車內底等紅燈真正有夠趣味，車踅過王子駅，坐到梶原駅落車，遮有一个商店街，聽著坐佇kám仔店頭个開講聲，寬寬仔騎佇路裡个跤踏車，這是在地人个生活。閣坐到熊野前駅落車，迒過鐵枝路行去日暮里舍人ライナー熊野前駅，閣愛peh起去樓頂坐車，因為是高架車佇頂懸走，一直坐到上尾站，坐佇第一排椅仔錄影，無落車原車閣坐轉來熊野前，繼續坐荒川線，坐到上尾站三ノ輪橋駅，嘛是足古錐个車頭，鐵枝路邊種足濟花。經過一間足舊足舊个旅社，規間看起來是柴起--个，進前佇牛哥地圖頂有看著，一暝1200￥，後擺有機會愛來蹛看覓。軁鐵枝路跤來到大路邊，當teh想紲落來欲去佗位，用行--个去sky tree敢若傷遠，看車牌仔(都营)這線有經過浅草，拄好一台bà-suh停倚來，緊坐--起-去，毋免買票因為我有1 day pass。到浅草才坐地下鉄去押上駅，出站後壁就是sky tree，這爾近看，hóo~有夠懸--个，khiàn kah頷頸仔會酸。押上拄好是這條浅草線尾站，會使直接坐到五反田免搬車。
写真
今仔日是拜二，阿母佮小妹欲坐下晡个飛機轉去--矣，頭一擺共跤踏車拎落去樓跤，怹拖行李箱仔對車頭去，我家己騎車仔去踅，閣有一禮拜个時間佇遮。
往南騎去，嘛是較愛騎海邊仔，風景較媠。其實今仔日才算是真正佇日本个街仔路頂騎車仔，騎佇路个倒手爿，真正鼻著油煙、熁著Bà-suh佮thôo-la-ku燒燒个iân-jín，有个路無畫跤踏車道愛騎佇上外口。横浜体育館足濟人，毋知是teh舉辦啥物活動，斡過去中華街个方向，氣氛就隨轉換，炒菜个油煙味、亂七八糟个看板，若毋是路裡个人講日語，感覺無成佇日本，閣騎去海邊仔个山下公園，看大隻船佮"穿紅鞋个查某囡仔"。軁過高速公路跤過橋就是元町，敢若到另外一个世界，轉來到日本个感覺，逐間店攏足古錐閣有個性。騎過山手磅空就開始peh崎，遮是横浜市南区，是住宅区，厝攏是起佇懸懸低低个山崙，墓仔埔就佇民家厝隔一條路个對面，日本人敢若無彼號禁忌，毋閣怹个墓看起來無遐恐怖，一枝一枝个石柱排kah足整齊，看起來足清氣siùnn。騎過米軍根岸住宅区个入就是足長个落崎，踅過横浜舊市区，佇地圖頂懸顯示一間金刀比羅大鷲神社（ことひら・おおとりじんじゃ），就騎去看覓，照佇網路頂看著拜神社个方法，先洗手漉喙，行去拜殿頭前搝鈴，擲錢行兩擺礼，拍兩下手才閣行一擺礼，誠心適。神社後壁是横浜橋商店街，這應該會使算怹个菜市仔，較早攏是佇日本齣內底看著，這馬總算親身來到位，會使鼻著、聽著真正商店街个気氛。佇FamiMart連網路，因為無辦Wifi機仔，攏愛揣這種免錢--个，暗算攏teh騎車仔應該無閒通用網路，先傳一屑仔相片分享予面友。順大通公園往東騎轉去，欲去看港口个夜景，經過象鼻公園，這是"逃げ恥"个撮影地，共跤踏車鎖佇昭和ビル後壁个樹仔跤，用行--个。好佳哉有紮鎖來，有个所在跤踏車無法度入去，胡白停閣驚仔去夆偷牽去。這个公園應該是有一个足成象鼻个護岸才號名-个，行對大桟橋ふ頭去，這會使坐國際線个大船，這拄好拄著日本丸欲出港，閣有出港儀式，差不多規船个人客攏出來共岸頂个人搧手，一條一條彩色个紙帶對船頂擲落來夠好看，較有力--个閣擲到予岸頂个人接著，船頂岸頂个人攏足歡喜耍做伙。足濟人來遮散步、運動，嘛有袂少人佮我仝款，欲佇遮等天暗通看横浜港个夜景。等兩點外鐘夜景翕了甘願--矣，踅去縣政府閣去赤煉瓦倉庫翕相，經過遊園地看大観覽車佮LandMark Tower騎轉去。
写真
跤踏車紮來第四工，除了拄到个頭一工下晡有騎一下仔，攏無騎著，囥佇房間內。明仔載阿母佮小妹就欲轉去--矣，今仔佇附近踅，買猶袂買著个物件。第二工佇超商食早頓，閣來就攏佇彼工下暗轉來就去對面超市款食--个，下暗个弁当佮隔工个早頓。
先去踅藥房，閣去踅冊店，出來看著一群上班族應該是出來食中晝，小妹講足成teh拍日本齣，真正有影是日本齣內底會使定定看著个情景。横浜美術館頭前个噴水池teh噴水，足濟囡仔耍kah規身軀澹lì-lok看起來有夠涼。拄仔彼間冊店無小弟寄買个雑誌，閣行去landmark tower个冊店揣，這棟樓是全横浜上蓋懸--个，足捷出現佇日本齣內底。為著配合Pokemon Go後個月佇横浜个活動，會使看著有夠濟Pikachu佮相關个產品。
踅過Cosmo World 遊園地，彼个大観覽車(Cosmo Clock)嘛是横浜港个地標，欲去World Portas，順紲佇遐食中晝，食飽去樓頂，買Lego閣有踅100箍商店。了後散步去赤レンガ(煉瓦)倉庫，這个古蹟是横浜開港就有--个，用紅磚仔起，煉瓦就是磚仔，外觀保留原底个模樣，內底改裝做商場。佇邊仔公園海岸邊椅仔休睏一下仔，坐水上バス(ba-suh)轉去横浜駅東口。小妹閣有物件愛買，踅去車頭樓頂个Lumine，真正有夠厲害，買到上尾仔一工，閣佇樓跤買有夠貴个雞卵糕，切細細一周700￥，店員講一个物件アルコール(a-lu-khoo-lu)，本底聽無，閣想一下仔，啊~當時仔就是alcohol酒精分，翻予小妹聽，才共店員講大丈夫，無要緊！暗頓去超市買，順紲款明仔載个早頓。
写真
騎横浜到東京這段実在無蓋快活，想欲跳--過閬--過，車袋仔紮--咧，騎去車頭坐電車， 佇來个第一工彼个所在共車仔包予好，揹入去到月台，坐到品川落車出來就是國道15號(第一京浜)，向北騎。國道上邊仔有畫跤踏車道，路攏有夠平，若有鐵蓋嘛是佇路个上邊仔，閣做kah佮路是平--个，車輦仔軋過攏無感覺。新橋駅是幾偌條路線共站包括上出名个山手線，高架鐵枝路下跤个空間隔做一格一格出租做生理大部分是做食--个，有出現佇足済齣日本齣內底。過新橋駅一塊仔斡昭和通，騎到會使正斡个路口才閣斡過，迒過首都高就到市場，今仔日休市，毋過準講有開嘛無法度凊彩入去，閣愛天猶未光就來才有喝魚仔通看。騎去邊仔个筑地場外市場，有夠済觀光客，逐間店攏足拍拚teh招人客，人済kah無法度騎愛用牽--个，無停落來買，一直行到外口大路邊，閣去對面个筑地本願寺，建築个樣式毋是一般个日本院寺彼種，是印度式--个，樓梯口兩隻獅以外閣有另外十幾隻个動物，彼時个宗主有來蹛過台灣，樓梯跤揣一个所在共車鎖--leh，入去內底參觀，佮台灣佛教个寺完全無仝个気氛。上路行晴海通、有明通過去台場，半路停落來公共便所方便，順紲水袋仔入水道頭个水，高速公路袂使騎車仔，毋過雙爿邊有小路仔會使予人行路佮騎跤踏車，閣有天橋會使去另外彼爿，台場頂遍有來，攏是踅街行程，這改直接到海辺仔，嘛是足済日本齣个撮影地，公用電話有無料wifi，佇樹仔跤休睏上網路，了後騎到大橋口，進前有做好功課，落馬牽車，管理員來共我問講敢是欲過橋，橋頂袂使騎車愛用牽--个，後壁輦閣愛鬥一台台車，予你無法度騎。
這頭去--个愛行北爿彼條，當仔開始感覚蓋心適，愈peh愈懸，閣在大車經過橋身敢若會㽎，小寡恐怖，看頂懸个橋塔个時，跤底感覚ngiau-ngiau，徛倚外口看出去，心臟跳有夠緊，毋過風景真正有夠媠，會使看著規个東京灣、東京塔，有時sky tree會出現佇大樓佮大樓中央个縫，kha-mé-lah伸出去翕相个時攏掠足絚，足驚仔落落去，可能會一下仔才會到海，因為遮到海面有五十外米懸，有个所在有維修个小枝樓梯，做這種工課真正無簡單。經過中央彼个塔有看袂著外口个"室內"，有通好休一下仔，有時仔有拄著運動穿插个人走倒反方向來，敢會人無限制方向，跤踏車才有？感覚行有夠久才到彼頭，坐電梯落去塗跤，共台車還予管理員，閣共說多謝，借用台車是無料--个。閣去看一下仔電車踅圓箍仔上大橋个情景，過芝浦上15號國道向北，早仔騎過个路閣騎一擺，等於kóo一碾轉來。過新橋無偌久就到前幾日仔來過个銀座，今仔日是禮拜，路封起來做"步行者天国"，連跤踏車嘛袂當騎，愛落來用牽--个，實在無法度共彼工暗時來个時規路車hú-hú叫鬧熱个車路，想做是仝一條，真正有夠済人，散步--个、翕相--个，啥物人種差不多攏有，若拜六禮拜有佇東京，建議一定愛來遮體會一下仔啥物叫做"步行者天国"，過後一个大路口猶閣是車來來去去，繼續上北，15號路佇日本橋進前變1路號，到日本橋落來用行--个，遮是日本全國公路个起點，中央彼隻麒麟是電影"麒麟の翼"个撮影地佮電影名个由來。過日本橋變4號道路，邊仔有足済棟有羅馬柱个大樓，是三井个大樓，閣有幾偌間銀行，閣騎一下仔變17號道路，過神田川就是秋葉原，斡倒手爿軁過鐵枝路跤，路嘛封起來做"步行者天国"，遮是漫画迷个天堂，相關个產品攏揣會著，周邊嘛有佮建國路差不多个電腦、電子零件，去FamiMart買涼仔啉，順紲用wifi，欲六點騎回頭，嘛是騎到品川坐電車，閣騎去橫浜美術館附近踅踅咧才閣轉去。
