騎固定齒仔環島—後手踅踅唸

一寡數字、統計

總路程：超過1000公里，無用mè-tah表，毋知確實个數字

總開銷：1700-箍，修理後壁輦200箍算在內，逐工个食食佮飲料，茶水無開著錢

上懸點：北宜公路540米

經過鄉鎮

第一工：屏東→大寮→鳥松→仁武→楠仔溪→橋仔頭→岡山→阿蓮→仁德→歸仁→新化→新市→善化→麻豆→下營→枊營→新營→鹹水→義竹→朴子→六跤→北港→元長

第二工：元長→褒忠→崙背→二崙→西螺→埤頭→溪湖→埔鹽→福興→秀水→彰化→烏日→台中→潭子→豐原→后里→三義

第三工：三義→銅鑼→後龍→造橋→苗栗→竹南→頭份→香山→新竹→竹北→新豐→湖口→楊梅

第四工：楊梅→埔心→平鎮→大溪→三峽→新店→石碇→坪林→頭城→焦溪→宜蘭→五結→羅東→冬山→蘇澳

第五工：蘇澳→東澳→南澳→和平(秀林)→秀林→新城→花蓮→壽豐

第六工：壽豐→豐田(壽豐)→鳳林→光復→瑞穗→玉里→富里→池上

第七工：池上→關山→鹿野→初鹿(卑南)→台東→太麻里→金崙(太麻里)→大武→達仁→獅仔→楓港(枋山)→加祿堂(枋山)→枋寮→新埤→潮州→竹田→麟洛→屏東

過暝地點：雲林元長國小、苗栗三義僑成國小、桃園楊梅國小、宜蘭蘇澳國小，花蓮壽豐國 小，台東池上福原國小

跤踏車消磨：一條鍊仔(本底就是舊个，轉來拄好換新个)，鋼絲4枝，外奶無啥磨著這馬閣咧使用

裝備：1台固定齒仔跤踏車、1台T2拖車、3軀衫仔褲、1領Hennesy Hammock(吊床)、1跤MRS Dragon汽化爐(無用著)、一跤ha̋ng-góo(無用著)、1跤shower水袋仔、一條ió-bih內奶佮修理跤踏車个家私、1支手機仔、1台平枋電腦(無好紮食電閣傷)、1塊太陽能枋、1篋仔衛生紙、1雙家己做个tarahumara涼鞋(上蓋利便，除了睏攏穿咧，閣毋免洗襪仔)

感想：

騎固定齒仔跤踏車環島真正是討皮疼，雖罔平路蓋好騎，但山路就愛落來牽車，有騎過就好矣。過程中袂講蓋忝，一工騎百三、四公里，上尾仔工較食力騎超過2百公里，阿無算起來是蓋輕鬆，佮行路比起來。誠心適个七工个旅行，嘛算流浪，家己出力騎過个路，會使聽著聲、聞著味，peh崎抑是落崎家己攏知影，這攏是坐車無法度體會著个，已經經過半冬矣，印象猶閣清楚。決定逐年一定愛用上蓋無一禮拜騎跤踏旅行。

騎固定齒仔環島—第七工 池上→屏東

2014／8／22
六點猶未半就上路，佇平交道前拄好去予頭班火車擋著。先去街裡揣物件食，足想欲啉豆奶，揣著一間賣饅頭个店。
七點前就經過南橫个入口，毋過這馬袂通。昨暝佮"替代役"開講，講今仔日天暗若騎無過南迴，可能愛佇大武過暝，毋過一上路就想講今仔日一定愛騎到厝，因為我足想我个眠床啊...。關山進前路邊出現一棟黃色人咧講个"歐洲式"个厝，應該是做民宿，台灣人看著這種厝就強欲起痟，清境農場遐嘛一堆，家己有个煞一直敲予歹，起彼號奇奇怪怪个物件。
八點半較加到鹿野，過鹿野溪橋猶閣是peh崎，閣愛落來牽車。佇初鹿个利便店歇一下食水。九點半入綠色磅空，無閣順台9線，行更生路入台東市，閣來个路就誠熟，十點外佇大同市仔停落來食一碗麪。

騎到底斡臨海路，離屏東156公里，衝...。過知本閣轉來台9，太麻里進前彼个大崎，閣愛落來用牽个，透中晝熱kah欲死，感覺牽超過一點鐘矣。過代天宮就落崎，thân拄仔儉个這馬khe̍h出來用，一直lu到太麻里免啥出力騎，閣入去利便店歇睏。過溪到金崙進前閣是peh崎、起起落落个山路，天氣熱一直想欲食冰个，佇金崙利便店啉一罐涼个。
過橋無偌久拄著一个阿啄仔少年仔，共a̋i-sah-tsuh，就騎做伙，那騎那開講。伊是米美國人，大學生，歇熱來台北學中文，一禮拜前租跤踏車對台北開始騎，兼四界拜訪朋友。看著伊个手扞仔吊一杯涼仔，就共伊講台語个俗語三項對查埔人無好个物件，"薄酒、冷茶、老查X"，伊聽了就欲共茶擲hak-ka̍k，我講"毋免啦，毋是逐个人攏會按呢啦"。閣講著我後學期閣欲去讀冊，伊講怹母仔嘛欲閣轉去學校讀冊，怹母仔差不多我愛叫大姊个年歲。
有人做伙騎就較袂無聊，感覺足緊就到大武，停落來佇利便店食涼仔，閣看地圖討論紲落來个行程，我講騎去屏東愛成百公里，伊想欲騎去恆春還車，我講會使經過牡丹，去遐看看咧食遐个物件。開始peh南迴公路我就閣愛落來牽，伊騎一段就停落來等我，對袋仔內底逐káinn挈無仝的果子出來食，閣請我，我嘛挈昨方抾个柚仔出來擘，一半請伊食，問伊講米國敢有這種果子，伊講這是第一遍食著。欲六點騎到壽峠，南迴公路上懸點，伊欲騎另外一條路屏199，我欲順南迴落山，佇遮講再會，提醒伊天暗矣愛點火，閣留資料會使連絡，欲騎上路想起來，做伙翕相。
七點外出來到楓港，hóo~這四工攏總佇台九騎470公里。過枋山了煞愛睏起來，那騎那盹龜，干焦會記得加䘵祿堂佮水底寮，可能這兩个所在拄好精神過來，看著路況就知影到啥物所在，毋過盹龜罔盹龜，拄著紅燈閣知人停落來，袂tsűn共挵過。真正精神過來是騎新埤經過拍鐵彼條到潮州个外環道，佇利便店頭前停落來，後輦已經斷幾偌枝鋼絲，閣有二十外公里，已經十點外矣。到竹田利便店買飲料啉，啉了繼續huainnh，到厝已經十二點矣，今仔日上硬斗，早仔六點外騎到半瞑十二點，超過兩百公里，結束七工个流浪，下暗會使睏我个眠床啊~

看相片

騎固定齒仔環島—第六工 花蓮壽豐→台東池上

2014／8／21

拄天光猶袂落吊床，就有聽著做運動个人放个音樂。洗喙、洗面、物件少寡款一下，共拖車敨落來，干焦騎車，出去踅踅lau-lau咧，因為這箍lē仔攏是較早日本時代移民仔村，一定有足濟物件通看。

先揣物件食，去車頭前一間日本厝(有新整理過)，足濟人生理敢若袂䆀。食到一半，一个人客袂記得是啥原因佮頭家冤家，彼个頭家嘛真有個性，袂巴結人客，堅持伊著个代誌。有个人就是按呢，幾元仔錢hông趁，就食人到到。食飽踅庄裡，閣有幾偌間日本厝，散掖佇後來才起个厝个中央，有个厝油漆用色足大膽。佮一个烏里桑問講，車頭後壁糖廠遐本來足濟日本厝，毋過攏已經敲了了矣，嘛是踅去看看咧。除了去予thai-ko國民黨挵歹去个遐—个，台灣人就是按呢足奇怪个，棄嫌家己舊个物件，才閣開錢去外國看別人个古蹟、才閣逐年開彼濟錢宣傳觀光，共想看覓咧，彼个攏共留luài，外國人就會相爭欲來看，khái(﹡1)閣需要開錢宣傳。足有日本味个花蓮，煞選一个怨恨日本充滿中國思想个首長，好佳哉遐个人嘛知影觀光是上輕可趁錢个。

轉來國校九點外，看一个老師佇遐用彼个門，開袂開，e̋~敢若是我縛吊床彼扇門？歹勢啦！車牽咧上路，來去豐田看看踅踅咧，看這个名就知影是日本名。遮个路攏是直佮橫个典型日本式个道路規劃。先去文史館看展示，了解一下仔大概。豐裡國小對面日本時代个派出所改做客家生活館，遮有真詳細个地圖，閣共景點編號，照地圖行就袂看落勾去。佮內底个大姐開姐開講，戰後日本人予國民黨趕轉去日本，厝大部分留予對西部請來个工人，足濟是客人，經濟狀況較無好，厝予風颱吹歹去，嘛無法度修理，年久月深就規間歹了了，所以才會看起來攏是後來起个磚仔厝，遐个日本厝算殘留落來个。用行个入去看日本墓仔埔。神社个鳥居閣佇咧，毋閣神社無去矣，改做碧蓮寺，閣有一寡石燈，開庄三十年記念碑，兩隻狛犬嘛有留咧。中晝就佇庄裡遮食炒飯。

想著一步，共猶未焦个衫、褲夾佇拖車个旗杆，予風吹會較緊焦。衫較薄閣是快焦个材質，一下仔就會使提落來，賰一領褲。半路看著龍眼就挽寡來食，毋知騎偌遠去矣，無意看著路裡家己个影，哭父~旗仔賰下半節，頂半節箠仔佮三角旗仔佮我个褲毋知落佇佗位去矣？共拖敨落來囥路邊(台9花蓮段大部分攏有跤踏車專用道)，騎欲半點鐘才抾著，原來出豐田了共衫收起來無偌久就落去矣，因為是別人个物件，愛完整還人。

繼續佇台9向南騎，鐵枝路攏佇邊仔。頂一káinn走這條是足濟年佮女朋友駛車去花蓮tshit-thô，這馬家己一个人用跤踏車騎過心情...毋知欲按怎表達。入去鳳林，佇利便店歇一下仔。過瑞穗猶閣有山路，到北迴歸線標誌已經五點半較加矣。停佇路邊毋知欲提啥去矣，拖車包 開開，煞敧一爿，內底物件攏捙對路邊坎跤落去，好佳哉無蓋深、跳luè抾khài。經過一giah攏柚仔園舞鶴附近，路邊有一粒柚仔看起來是拄挽个，共抾khài收入去袋仔內。玉里進前天就暗矣，共電火鬥好。揣無麪擔仔，攏是像食酒攤彼種个，佇𥴊仔店啉一罐汽水閣上路。

過玉里開始颯雨，一陣一陣。騎毋知人停，九點外到池上，腹肚足枵，食一碗麪，順紲問國校佇佗位。過鐵路，揣著褔原國小，奇怪khài毋是池上國小。內底放空城，問佇涼亭仔耍手機仔个少年仔，報我去過路彼棟宿舍揣"替代役"。叫我等一下，拄身軀洗好。共我案內好就閣轉去房間。先充電，嘛是去便所洗身軀，揣兩欉樹仔縛吊床，才閣騎出去利便店啉bì-luh。
*1阮屏東人共"哪會"講做"khái" 

看相片

騎固定齒仔環島—第五工20140820蘇澳→蘇花公路→花蓮壽豐

2014/8/20

六點外醒，是好天！先看一下仔面冊頂頭自頂禮拜就開始追蹤个"蘇花公路即時路況"。

今仔日早頓食較濟，閣紮一塊餅欲佇路裡食。昨方足暗才到位，下早仔食飽就欲走矣，頂擺來是十外年前个代誌矣，蘇澳對我來講那親像來到外國，規个氣味、氣氛連台語就無啥仝，佇台灣這種小型个鄉鎮才是上趣味、通拜訪个所在，有外地無个有形、無形个資產，保持落去才是永久个，一直開發死較緊！恁有足濟大都市無个物件啊！

七點外到蘇花公路起頭，LED ka̋ng-páng(看板)顯示路裡个路況、天氣遮个資訊。日頭已經會咬人矣，一開始个崎就落來牽車。差不多攏咧牽車較濟，大台tho-lah-kuh經過搧著小寡會搟[hián]，像一隻一隻个怪獸佇路裡咧衝。遮个海佮西部个海無啥仝，是足深足深个藍色。第一个庄頭是東澳，先去加油站清一下仔胃腸，閣去利便店吹冷氣降溫。

好哉佳有鬥頭前擋仔，落崎个時我共跤架佇後壁(因為是固定齒仔跤踏車，跤踏仔袂停得)，放心仔放予lu，可能是拖車个關係，感覺後壁有人佇鬥捒，毋過上崎就艱苦矣，踏無三下一定愛落來用牽个。

拄著對向顧路个車友，過去問看覓敢有需要鬥相共，是少年仔騎車仔環島，老父騎烏肚䆀綴，半路閣佮一个香港來个車友，破輦爾好處理。無偌久看著一个少年仔用行个，講伊前一工對崇德到和平48公里早仔行到暗時，相連紲行十二點鐘，等下新澳磅空有工程封一爿，工程人員會放予我過。真正到磅空進前，指揮交通个工程人員就共擋車个"街路筍"徒開予我過，新澳磅空分兩空，這爿較細空干焦一線，除了停佇半路一台工程車，規條攏我个，寬寬仔騎，內底有夠涼，有个所在閣咧滴水。

中晝頓佇南澳食，食飽共頭家討水，頭家講無水，叫我去邊仔戶政事務所入，了後就去利便店歇睏，盹龜一下。過南澳溪順山勢斡正手爿，頭殼頂有工程咧做，後擺路攏走高架。過武塔了後又閣開始牽車，感覺牽超過一點鐘遐爾仔久，足無簡單路較平矣，對山剖開，出去就看就海，心情嘛開去矣，愈騎愈緊。過漢本落崎，軁過澳花磅空，過橋个時看著一个行佇對面佮我仝向个少年仔，有佇網路頂看著伊，講今仔欲行到和平。佇公所借入一下仔茶，過鐵枝路閣peh崎入和平磅空佮和仁磅空，便若拄著溪仔就是落崎，過溪閣peh崎。有个磅空較狹，大台tho-lah-kuh對邊仔差不多三十公分搧過，若欲騎遮一定愛有電火，予車看會著你。來到"太魯閣國家公園"个石碑，已經四點外矣，停落來歇睏，閣拜託別人共我翕一張相。

就按呢起起落落，過磅空、出磅空，有時仔離海面攏歸百米，經過有名个清水斷崖，閣有兩、三个磅空，過崇德落平地蘇花公路就算騎了矣早仔七點外拚到下晡五點外，差不多一半是用牽个。

uê騎車仔環島个人共蘇花公路想kah足危險，毋敢騎，坐火車過，這是真無彩个代誌，世界級个風景neh！其實啥物代誌攏有一定个風險，會驚蹛厝睏就好啊，我感覺東方人攏欠缺西洋人彼種冒險个精神。有機會一定會閣來，毋過buài閣騎單速固定齒仔，愛有變速，上蓋無崎愛peh會起去。

過立露溪—黃金之河，就是新城。拄著一个騎公路車个車友，在地人，講是出來運動。開講一下仔，哇~破輦，叫車友先行，我佇路邊補輦。手烏烏去邊仔徛家借洗手，毋過攏叫無人，就家己動手。六點半較加入花蓮市，停青紅燈看對面有一个名真趣味个高中叫"海星"。七點外佇花蓮高工門口停，腹肚足枵，入去一間越南查某頭家開个"燒臘"，因為我無食有跤个動物，問頭家講肉敢會使換其他个菜，"當然會使"，攏總予我五項菜，添飯个時頭家一直添閣一直問按呢敢有夠，結果捀一盤尖kah若山个飯菜，阿閣有一種hông攪飯个料，有葱仔、薟椒仔佮其也毋知是啥物件，問頭家，緊持bua̋i講伊个秘方。伊个紅茶嘛有夠芳，我个茶罐仔欲五百CC，栽兩罐較加，欲走進前閣共入予滇，這頓食一下真正有粗飽。

紲落來花蓮市就無停，一直騎。尾仔想著有一个所在放袂記得去矣，就是吉安个"慶修院"(吉野布教所)，是講暗bong-bong嘛看啥，閣暗時嘛關門矣。就按呢一直騎、一直騎，速度應該攏有超過三十，吉安過木瓜溪就是壽豐，九點外(今仔日對早起七點騎到下暗九點，當然有歇睏)騎到壽豐國小，共佇辦冰室的烏里桑問借過瞑，講愛留資料，簿仔頂干焦這个歇熱就有四、五个，閣愛影印証件，阿伯袂曉用影印機，我家己印家貼。烏里桑講愛睏佗位家己揀，毋過袂使開教室。學校邊今仔拄好有商展(這種一禮拜來一擺、兩擺个叫商展，固定式个才叫夜市仔)，足吵，烏里桑講十點過就收矣。物件囥咧，先去便所洗身軀，這个時陣沖水袋仔就足好用。洗好就用行路去外口利便店啉一罐仔bì-luh，因為這兩工攏有通仔充電，平枋電腦就放心仔提出來用，傳相片、佮朋友交流一下。啉了商展嘛差不多欲煞矣，轉去就共吊床縛佇兩欉樹仔中央，入去嘛毋知倒偌久，咧欲睏去矣，哭枵！落雨！緊共吊床敨落來，披个衫褲佮物件收入來亭仔跤，用一晡吊床毋知欲按怎吊，到尾仔一頭縛佇花台邊个鐵架仔，別外一頭縛佇教室門个門杆，tsűn按呢睏。

看相片

騎固定齒仔環島--第四工20140819桃園楊梅→宜蘭蘇澳

 2014／8／19

半暝仔有落過雨，天小寡涼冷閣鳥陰烏陰。昨方洗好个衫閣足澹，包佇ga-lá-suh橐仔lìn。已經有真濟人來學校內底運動，警衛室的門關个，驚共攪吵著就無挵門。七點佇大路邊的店食早頓，出來騎車顛倒食較少，三頓以外無食點心嘛袂講蓋枵，睏眠嘛較正常。

食飽順台1向東行，過埔心車頭轉南平路，進入平鎮。七點外是上班時間，所有个大、細隻車、烏肚䆀齊出動，方向攏差不多，攏是欲對台北去，幾十公里以內可能干焦我一隻跤踏車，佇車陣內底軁來軁去。真正是䆀所在，有夠齷齪，佇台北食頭路買袂起台北个厝就買對遮來，用路裡个時間來換，台北附近个城市攏變成伊个衛星。

桃112接台3，騎一下仔接台4，沿大漢溪落一个大崎，好佳哉有鬥頭前擋仔。過橋就到大溪，走台3猶閣愛peh崎，44-18齒700C个固定齒仔愛足出力才khàng會起去，佇一間寺暫停入水。三峽進前開始落崎，轉新北110，猶閣是一直peh崎，到上懸點落新店前khah電話予台北个朋友。新店就有"台北味"啊，過碧潭大橋就是新店，去應該是菜市仔食一碗麪，欲上北宜進前先去利便店傳一下相片，佇遮放四工來第一擺X。北宜足濟年前捌行過，毋過攏無印象去矣。

頭起先閣有法度騎，愈來愈崎就愛落來用牽个。十二點半才騎十幾公里，佇一間廟仔歇睏。佮一个阿伯仔開講，講伊逐工攏會起來飼幾偌十隻狗仔，這條路啥物所在有幾隻伊攏知，共叫狗仔就落來，食了就自動轉去。就按呢那騎那牽，其實用牽个時間較濟，來到一間咖啡店，叫"卡拉瓦里"，有提供予車友免費入茶，騎到北宜上懸點雲海國小開始颯雨，騎無偌久就到足有名个海倫咖啡，佇遮等一下仔才繼續騎。落到坪林食一盤茶油麪線做點心。五點半過新北宜蘭kap界，會使看著蘭陽平洋个海岸線矣，落有名个九彎十八斡，但我个後輪又閣斷一支鋼絲，過彎一直幌。過一个彎就看著遠遠佇海裡个龜山島，愈來愈大隻，六點外出北宜公路頭城路口。

礁溪真鬧熱人車攏有夠濟，佇宜蘭路邊自助餐食晚頓，食飽繼續行，二結、羅東(無時間去踅夜市仔)、冬山，有時仔足久攏我一台跤踏車佇路裡，暗bong-bong、惦tsu-tsu，干焦風搧過耳邊个聲。老父敲電話來，叫我講量早歇睏，我講毋過明仔載足硬斗，所以一定愛騎到底。九點外到蘇澳，去利便店啉一罐Bì-luh，閣問看附近个學校，先去蘇澳國小，踅一晡毋知欲問啥人，閣轉去利便店，報國中佮蘇澳海事、較遠有士敏國小。蘇澳國中揣無人通問，蘇澳海事講袂使，閣轉去國小，這个時陣閣開始落雨矣，煩惱明仔載。問著一个囡仔，揣著"替代役"，共我講佗位會使利用就轉去伊个房間，可能定定有人來借所在過暝个款。想欲tshu塗跤，按怎撨攏撨袂好勢，到尾仔一頭縛樓梯、一頭縛欄杆。雖然落雨嘛是共衫洗洗咧，到十一點外才睏，今仔是上暗睏个。

看相片

騎固定齒仔環島—第三工20140818苗栗三義→桃園楊梅

2014/8/18

昨方洗好个衫猶未啥焦，物件款好勢。昨暗十點外到位，這馬才看著無蓋大个校園，毋閣環境啥貨看會出來是用心咧整理，教學大樓有設計過。讀遮个囡仔一定真快樂。出來到校門口想欲共"替代役"少年仔說一个多謝，毋閣門猶關咧，應該是猶未起床，就家己開門出去。

有名个觀光所在"勝興車頭"就佇附近，騎來去看一下。講無蓋遠嘛愛騎規半點鐘，因為遮是山區。

柴造个日本時代个車頭，今仔毋是假日，嘛有可能時間猶早，攏無人客，翕過相，佮一个烏肉桑開講，想著遮是苗栗愛講客話，好佳哉伊會曉講台語。"龍騰斷橋"閣愛tsiânn十公里(个山路)，後擺才閣來啦，一定會閣有機會啦。順原路騎轉去，過橋个時才看著雙爿邊个厝，下跤是像賽車道个高速公路，蹛佇遮个人哪擋會著。佇橋邊食早頓，慣勢早仔愛啉豆奶，無咧賣，叫別項。跋一隻蟲佇hin(彼裡)，閣提去共頭家換一杯。

一直落崎到三義街裡，已經鬧熱滾滾，原來崎頂个木彫街無算市内，是觀光客去个所在。對久長蹛平地个我來講，苗栗是一个真奇怪个所在，無一giah是平个，一直peh崎、落崎。台13入苗栗市，九點，佇果子"店"買一寡蘋果，貧惰提平枋電腦出來，去利便店上網傳相片。經過苗縣政府刁工停落來翕一張比中指个相片。走台13甲繼續上北，停造橋參觀舊火車頭，干焦佇坐客運走高速公路个時陣才會看著个地名。又閣是起起落个山路，半路看著一个磅空，拄咧想就聽著火車聲，趕緊提kha-me-lah出來翕一張火車出磅空个相。

攏一直叫是竹南是新竹以南，應該是佇新竹，結果嘛是算苗栗。拄著兩个行路環島个少年仔，做伙翕一張相，兩个已經行四十外工矣，閣兩、三工就會使轉去香山。中晝刁工揣自助餐食飯，食飽上路，看著利便店嘛是擋袂牢入去吹冷氣歇睏，閣拄著彼兩个少年仔，開講一下仔，加面冊做好友。揣車店欲處理後輦个鋼絲，問一間，報去另外一間，無法度處理，閣轉去討一寡茶。台13出竹南嘛是peh崎，阿母仔khà電話來，共講今馬个位置。佇路邊看著真熟似个景，原來大埔"張藥房"就是佇遮！厝好好無代無誌共人㪗摃予歹，根本阿無犯著路，真正欺負人悿悿。

佇香山進前接台1線。香山火車頭拄整修了新tshat-tshat，保留柴造日本式。環島三工第一káinn看著海，佇香山个陸橋頂。到新竹市已經下晡四點外，揣廟洗一下仔手面、入茶，冰涼个茶人喉，hóo~有夠好。後壁輦愈晃愈嚴重，揣一間車店換斷去个鋼絲、校輦，開兩百箍。佇鬧熱个城隍廟前停一下仔。五點半經過日本時代保留落來个新竹車頭，小可咧颯雨。到竹北雨真正落落來，入去利便店覓雨。佇面冊共一个對潮州調來遮个老師ai-sa-tsu一下。過六點半雨無變細，歸去買一个涼麪當做暗頓。研究一下仔地圖，佇遮欲呵咾一下仔Nokia手機仔頂个地圖，真正好用，"離線"嘛會使用，毋過無較縒，公司嘛是倒擔矣。七點半，雨幔提出來穿，拖車有防水會使放心仔佇雨裡騎，電火結褲頭，規領雨幔攏發光。

本底想講佇過來一、兩个庄頭過暝，先到新豐，有一个大學佇遮，車有夠濟，足齷齪，閣一直騎，阿無莫停一直騎到楊梅好啊！以早攏是對高速公路頂看過來，今馬是對台1線看過去高速公路，閣是騎跤踏車，毋知欲按怎形容个感覺。佇雨裡騎點外鐘到楊梅，遮个路嘛是攏趨个，台1線上大條上懸。問著國校佇佗位，警衛室个阿伯閣通知主任，閣叫我登記資料，借浴間仔予我洗身軀，過運動埕對面棟揣所在吊吊床，遮有插座通充電。八月中遮已經小可會涼矣，明仔載就欲過宜蘭矣...

看相片

騎固定齒仔環島--第二工20140817雲林元長→苗栗三義

天光就有袂少人來學校內裡運動，六點外起床。喙、面洗好勢，共物件楔入去拖車，sah-bûn猶未焦共吊佇拖車邊。

跤踏車加拖車足長無好停，踅翻頭車頭向欲去个方向、停早頓店對面。昨方第一工車仔就出問題，後輦鋼絲斷一枝、tsiânn十枝冗去，嘛是愛騎。

台19雙爿攏是田園，經過褒忠、崙背，切雲154去西螺，咧欲八點半。西螺閣有規條街仔是古厝。入去福安宮拜拜，遮有冰茶通入。九點外經過西螺大橋，雖然有騎過兩、三擺矣，毋過心情猶是激動，停落來翕幾張相。

紅kih-kih个西螺迒過濁水溪，對面就是彰化。佇埤頭接轉來台19，十點半才到本來欲過瞑个溪湖，遮有一个糖廠，佇車行借風抽灌風，歇睏兼佮頭家娘開講，講著亻因較早去環島个代誌。秀水過就是彰化市，佇遮食中晝，想欲食飯，踅一晡揣無、有个是無開，到尾仔嘛是食麪。透中晝先入去利便店吹冷氣、眯一下。

拄著一對翁某，翁是阿啄仔，騎跤踏車四界𨑨迌。彰化欲過台中个路是上蓋複雜个，行台1乙入台中，經過烏日看著"成功嶺"三字，想著頂遍來已經是二十年前个代誌矣。台中是我印象中上無好个城市，交通有夠亂，佇遮延點外鐘，一个閣一个青紅燈，袂輸過攏袂了。足無簡單出台中，順台3過潭子到豐原，敲一个電話予蹛遮上細漢个小妹。台3上北，過橋進前食一支仔冰，入后里天就暗矣，遮是台灣樂器个生產要地，嘛有袂少古厝，猶閣是食麪做暗頓，繼續趕路，出后里先落足長个崎，看地圖寫"風鼓崎"，到看著高速公路，路裡干焦我一个攏無別隻車，無變速閣拖拖車，迒高速公路个崎就落車規路用牽个，感覺已經牽規點鐘矣過三義工業區，遮有幾偌間有名个車廠。到三義有名个木彫街已經九點外，先去利便店歇睏啉Bì-luh，問國校佇佗位，愛過高速公路頂个橋過彼爿，是"僑成"國小，共顧門"替代役"問，一下就答應予我過瞑，閣借浴間仔予我洗身軀。兩排教室斡角是一大片空間，攏予我用，有桌仔，毋過有蠓，嘛是佇外口揣兩欉樹仔吊我个吊床睏。

這个庄頭予高速公路剖做兩爿，蹛彼爿个囡仔愛過橋來這爿讀册，規工攏車聲hòng-hòng叫，實在袂慣勢。

看相片

騎固定齒仔環島--第一工 屏東→雲林元長

踏話頭

想著後學年開始欲去新个學校教，閣欲開始讀研究所，想欲來做一件較早毋捌做過个代誌，嘛有可能有受著一支影片个影響，一个台灣阿母佮德國阿爸tshuā查某囝駛帆船環遊世界，啊~來去騎跤踏車環島...，騎固定齒仔單速跤踏車。好！就是後禮拜。起行前三工去共朋友借一台拖車佮會使夾擋仔个頭前輦，嘛用google地圖看一下仔路線欲按怎行，決定peh北宜過宜蘭。

DAY 1， Aug. 16 2014 Sat. 拜六

一直到半瞑物件猶未款tsiâu，頭前擋嘛猶鬥袂好勢，本底想講" kán~較有氣魄咧著！"，就tsűn無擋仔騎一輾(好佳哉有鬥好，無第四工半瞑真有可能愛睏佇北宜公路頂)，一直到兩點外才處理好勢。

透早六點欲半起床，嘛是一直摸一直摸，到八點半才上路，來去流浪一禮拜~

台一線騎到楠梓國中頭前拄著車隊个歐陽，欲轉去台南，共我翕一張相。到岡山轉19甲，自這陣開始一直到彰化，攏佮台19線離袂開。路邊看著龍眼仔，tshuah一把那騎那食，蓋甜但無啥肉，會使補充一寡微他敏C。順台39高鐵路線騎，佇埤仔頭食一碗麪，轉來19甲到新化街仔歇睏。新市、善化經過麻善大橋到麻豆，下晡時仔無碗粿通食，買兩粒仔煎包佇廟埕食。繼續19甲，下營、新營太子宮、鹹水，過八掌溪就是嘉義縣，佇義竹東後寮派出所看一下仔日本厝，遮个教會嘛是舊厝。到朴子車仔後輦怪怪，幾偌枝鋼絲冗去矣，絞予絚，這个時陣猶閣毋知影代誌大條矣，干焦感覺怪怪。咧欲六點，足想欲食飯，揣一間自助餐，夾三項菜配白飯，湯飲免驚。佇朴子溪橋頂停落來看紅霞，嘛共翕起來。一段長閣無滋無味的路，干焦有暗淡个路燈陪伴，一直到北港。

入去媽祖廟拜拜兼入茶，本底欲佇遮過瞑，佮暗算个第一工過瞑个所在彰化溪州閣差七、八十公里，才八點外，閣騎~，九點到元長个利便商店歇睏，啉一罐Bì-luh紲問看有啥物所在通過瞑，店員講公園蠓仔足濟，閣問國校欲按怎去。元長國校內底暗-bong-bong，無半葩電火有著，路邊問一个少年仔，講是蹛對面个出來散步，那佮伊開講那款物件。自做兵了後，毋捌洗身軀个時有查埔仔佇邊仔佮我講話。一直到共吊床吊好，少年仔才轉去。
洗好个衫是一个大問題。我有想著一步，紮一跤網仔个袋仔，共洗好个衫囥入去，縛一條索仔，提起來幌圓箍仔，想欲用按呢共水hiù出去，毋過效果無講蓋好，手嘛有夠酸，放棄。
第一瞑足好睏。
看相片